მას შემდეგ რაც კოლმან დომინგომ მიანიშნა, თითქოს პარიზ ჯექსონი მხარს უჭერდა მაიკლ ჯექსონის ბიოგრაფიულ ფილმს, პარიზმა განცხადება გაავრცელა და აღნიშნა, რომ სინამდვილეში პროექტს თავიდანვე ჩამოშორდა, რადგან სცენარი „მცდარი” ეჩვენა.
ლეგენდარული მომღერლის ქალიშვილმა ფილმის სცენარს “არაზუსტი” და “სრული სიცრუე” უწოდა.
2 სექტემბერს პარიზ ჯექსონმა ინსტაგრამ სთორიში Euphoria-ს მსახიობი კოლმან დომინგო მონიშნა და დაწერა:“ნუ აწვდი ინფორმაციას საზოგადოებას, თითქოს მხარს ვუჭერ ამ ფილმის გადაღებას, სადაც ჩემი მონაწილეობა ნულოვანია. ეს ძალიან უცნაურია.“
პარიზმა ასევე დაამატა: „სცენარის ერთ-ერთ პირველ ვერსიას გავეცანი და ჩემი შენიშვნები იმ ნაწილში შევიტანე, სადაც ინფორმაცია მცდარი იყო. რადგან არავინ გამომეხმაურა, ჩემი ჩვეული ცხოვრება გავაგრძელე.“
Billboard-მა კომენტარისთვის დომინგოს წარმომადგენელს მიმართა.
პარიზ ჯექსონის პოსტები მას შემდეგ გამოქვეყნდა, რაც კოლმან დომინგომ ჟურნალ People-თან საუბარში ახსენა, თითქოს ის და მისი ძმა პრინსი ამ პროექტის მხარდამჭერები იყვნენ. მოგვიანებით გამოცემამ სტატია განაახლა და პარიზის მხარდაჭერაზე დომინგოს სიტყვები ამოიღო. აღსანიშნავია, რომ დომინგო ახალ ფილმში ჯო ჯექსონს, მაიკლ ჯექსონის მამას და მის ყოფილ მენეჯერს განასახიერებს.
შემდგომ ვიდეოებში პარიზ ჯექსონმა კიდევ უფრო დეტალურად ისაუბრა ფილმზე და ზოგადად, ბიოგრაფიულ ფილმებზე: “ეს ჰოლივუდია. ფანტაზიის სამყარო, რომელსაც რეალობასთან კავშირი არ აქვს. თუმცა თქვენ ამას რეალობად გასაღებენ.“
„შინაარსი კონტროლდება, ბევრი უზუსტობაა და სრული სიცრუე. საბოლოოდ, ეს ჩემთვის მიუღებელია. არ მომწონს სიცრუე. ხმა ავიმაღლე, თუმცა არავინ შეისმინა, მერე კი უბრალოდ წავედი.“ – თქვა მან.
ამასთან, პარიზმა აღნიშნა, რომ მაიკლ ჯექსონის გულშემატკივრებს თავისუფლად შეუძლიათ ფილმით დატკბნენ: „მოგეწონებათ. უბრალოდ უყურეთ, ისიამოვნეთ, რაც გინდათ, ის აკეთეთ, მაგრამ მე ამ ყველაფერში ნუ გამრევთ.“
ანტუან ფუკას ფილმის, Michael-ის გამოსვლა 2026 წლის აპრილში იგეგმება.
