ნილ იანგი კვლავ ხმამაღლა გამოხატავს პროტესტს. მუსიკოსმა და მისმა ბენდმა – Chrome Hearts-მა 4 სექტემბერს გამოაქვეყნეს სიმღერა, რომელშიც პირდაპირ ნახსენებია ტრამპის სლოგანები და ბოლო მოქმედებები. ნამუშევარი აპროტესტებს შეერთებული შტატების პრეზიდენტის პოლიტიკას, რასაც ბევრი ავტოკრატიულ მმართველობას უწოდებს.
ტრეკი იწყება ტრამპის ცნობილი სლოგანით – Make America Great Again და მასზე ირონიული მინიშნებით. შემდეგ გადადის პრეზიდენტის უახლესი გადაწყვეტილების კრიტიკაზე, როცა მან შეიარაღებული ჯარისკაცებით გაავსო ქვეყნის დედაქალაქის ქუჩები, რათა ებრძოლოს დანაშაულს, რომლის არსებობასაც თავად თეთრი სახლი ამტკიცებს.
79 წლის იანგი უკვე ნახევარ საუკუნეზე მეტია, საპროტესტო სიმღერების შესრულებით არის ცნობილი. ამ უკანასკნელში ტრამპის სახელი არ ჟღერდება, თუმცა ყველა მსმენელისთვის გასაგებია შინაარსი და ადრესატი. 2 სექტემბერს იანგი სიმღერას საკუთარ ვებ-გვერდზე გამოეხმაურა და უწოდა „ახალი ნაწარმოები ამ უცნაური დროებისთვის“.
პროტესტით ცნობილ მომღერლებს შორის, ვინც ხმამაღლა აკრიტიკებს ტრამპს, იანგი თავის თაობაში ერთ-ერთი ყველაზე აქტიურია. ბოლო დროს ის სულ უფრო ხშირად აზიარებს მოსაზრებებს შეერთებული შტატების პრეზიდენტზე. „თუ დონალდ ტრამპზე ვილაპარაკებ, შეიძლება იმათ შორის აღმოვჩნდე, ვისაც ამერიკაში დაბრუნებისას პრობლემებს შეუქმნიან ან ციხეში ჩასვამენ,” – დაწერა იანგმა, რომელმაც 2020 წელს კანადის და აშშ-ის ორმაგი მოქალაქეობა მიიღო. „ეს სულ უფრო ხშირად ხდება. ახალი გაფრთხილებებია მათთვის, ვინც ამერიკაში ბრუნდება… თუ ევროპიდან დავბრუნდები და შემაჩერებენ, ვეღარ მოვაწყობ ჩემს ტურნეს და ის ხალხი, ვინც ბილეთები იყიდა, ჩემს კონცერტზე დასწრებას ვეღარ შეძლებენ,“ – წერდა წარსულში იანგი. „აი, ასეა, მეგობრებო. თუ რამე ცუდს იტყვით ტრამპზე ან მის ადმინისტრაციაზე და თუ კანადელი ხართ, შეიძლება აშშ-ში დაბრუნებისას აგიკრძალონ საზღვრის გადაკვეთა. და თუ ორმაგი მოქალაქეობა გაქვთ, როგორც მე, ვინ იცის, რა მოხდება? ერთად გავიგებთ.“
იანგმა დონალდ ტრამპის მიმართ პროტესტი წარსულშიც არაერთხელ გამოთქვა. მათ შორის მაშინ, როცა პრეზიდენტმა იანგის 1989 წლის უსამართლობის წინააღმდეგ დაწერილი ჰიმნი – Rockin’ in the Free World თავისი პირველი საარჩევნო კამპანიისას გამოიყენა. მოგვიანებით, 2020 წელს, იანგმა ამ სიმღერისა და Devil’s Sidewalk-ის გამოყენებისთვის ტრამპს უჩივლა, თუმცა სარჩელი უკან გაიწვია მას შემდეგ, რაც არჩევნები ბაიდენმა მოიგო. 2020 წელს, როცა აშშ-ის მოქალაქე გახდა, იანგმა ტრამპს ღია წერილი მიუძღვნა და მას ქვეყნის სირცხვილი უწოდა.
2025 წლის მაისში მომღერალმა კიდევ ერთხელ გამოხატა უკმაყოფილება ტრამპის მიმართ, ის უკონტროლოდაც კი მოიხსენია მას შემდეგ, რაც პრეზიდენტმა ბრიუს სპრინგსტინი და ტეილორ სვიფტი საჯაროდ დაამცირა. „ბრიუსი და ათასობით მუსიკოსი ფიქრობს, რომ ამერიკას ანადგურებ,“ – დაწერა იანგმა. „შეწყვიტე ფიქრი იმაზე, რას ამბობენ როკერები. იფიქრე, როგორ გადაარჩინო ამერიკა იმ ქაოსისგან, რომელიც თავად შექმენი.“
ნახეთ BigCrime-ის ვიდეო:
