ცნობილი ფსიქოდელიური პოპ მუსიკის შემსრულებელი და პროდიუსერი კევინ პარკერი 17 ოქტომბერს მეხუთე ალბომს, Deadbeat-ს გამოსცემს. ალბომი Sony Music-ის ლეიბლის ქვეშ გამოშვებული მისი პირველი ნამუშევარი იქნება.
Deadbeat-ის მეორე სინგლი, Loser, მუსიკალურ ვიდეოსთან ერთად 3 სექტემბერს გამოვიდა, რომელიც რეჟისორმა Kristofski-მ გადაიღო. ვიდეოკლიპში სერიალ Stranger Things-ის მსახიობი ჯო კირი მონაწილეობს, ამ სიმღერის გამოცემა კი აგვისტოში გამოშვებულ ელექტრონულ კომპოზიციას, End of Summer-ს მოჰყვა.
კევინ პარკერმა ახალი ალბომი ძირითადად თავის ქალაქში, ფრემანტლში და სტუდია Wave House-ში შექმნა.
მიუხედავად იმისა რომ ტურნეებზე Tame Impala სრული ბენდის შემადგენლობით გამოდის, მაინც ერთკაციან პროექტად ითვლება. წლების განმავლობაში კევინ პარკერს ისეთი ჯილდოები აქვს მიღებული, როგორებიცაა: ARIA Awards, APRA Awards, Brit Awards, ხოლო 2024 წელს, ჯგუფ Justice-თან კოლაბორაციით გრემი დაიმსახურა.
ალბომი Deadbeat 17 ოქტომბერს გამოვა, რომელიც 2020 წლის The Slow Rush-ის შემდეგ, არტისტის პირველი სტუდიური ნამუშევარია. ამ უკანასკნელმა კი ავსტრალიის ჩარტში პირველი ადგილი, ხოლო აშშ-ში Billboard 200-ში და ბრიტანეთის ოფიციალურ ჩარტში მე-3 ადგილი დაიმკვიდრა. 2015 წელს გამოცემული ალბომი Currents ავსტრალიის ჩარტში N1 ადგილზე გავიდა, აშშ-სა და ბრიტანეთში კი ტოპ ხუთეულში მოხვდა. სწორედ ამ ალბომის წყალობით კევინ პარკერმა საუკეთესო საერთაშორისო ჯგუფისთვის Brit Award მიიღო.
ახალი ალბომის, Deadbeat-ის აღწერაში კი ვკითხულობთ: „ეს არის არტისტის ნამუშევარი, რომელმაც ოსტატობის ახალ დონეს მიაღწია. ალბომი მისი, როგორც ცნობილი პერფექციონისტის ახლებური, სპონტანური მიდგომით არის შექმნილი.”
ალბომი Deadbeat Tame Impala-ს პირველი პროექტია Sony Music-ის ლეიბლ Columbia Records-თან, წლების განმავლობაში იგი Modular Recordings-სა და Universal Music-თან თანამშრომლობდა.
მიუხედავად იმისა, რომ ტურნეში არ იმყოფება, Tame Impala დეკემბერში Justice-ის ავსტრალიურ ტურნეში სპეციალურად მოწვეული DJ-ის სტატუსით წარდგება.
