მადონამ იმ სულიერი გამოცდილების დეტალები გააზიარა, რომელიც ხელოვნურ კომაში ყოფნის დროს მიიღო, როცა მომღერალი მძიმე ბაქტერიულ ინფექციას ებრძოდა.
ორი წლის შემდეგ, რაც კომაში ოთხი დღე გაატარა, პოპვარსკვლავმა ჯეი შეტის პოდკასტში გაამხილა, რომ უგონოდ ყოფნის დროს მან გარდაცვლილი დედა ნახა. „თითქმის სამყაროს მეორე მხარეს ვიყავი და ცნობიერი მომენტი მქონდა,” – იხსენებს მომღერალი. „დედაჩემი გამომეცხადა და მკითხა: ‘გინდა ჩემთან წამოსვლა?’”
„მე უარი ვუთხარი. ჩემი ასისტენტი ამ დროს ოთახში ჩემთან ერთად იყო. მე უგონოდ ვიყავი, მაგრამ მან გაიგო, როცა ვთქვი ‘არა’. და როცა საბოლოოდ გავიღვიძე, გავაანალიზე, რომ ეს ‘არა’ მე მჭირდებოდა პატიებისთვის და იმ ადამიანებთან მორიგებისთვის, რომელთა მიმართაც ჯერ კიდევ ბრაზს განვიცდიდი.”
ერთ-ერთი ასეთ ადამიანი, მომღერლის თქმით, უმცროსი ძმა კრისტოფერ ჩიკონე იყო, რომელიც ოქტომბერში 63 წლის ასაკში გარდაიცვალა. მას შემდეგ, რაც მადონა ცნობილი გახდა, და-ძმის ურთიერთობა წლების განმავლობაში დაძაბული იყო. კრისტოფერი დას ინტერვიუს დროს მისი სექსუალური ორიენტაციის გამხელაში ადანაშაულებდა. მისი გარდაცვალების შემდეგ მადონამ დაწერა: „გარკვეული პერიოდი ჩვენ ურთიერთობა არ გვქონდა, მაგრამ როცა ჩემი ძმა ავად გახდა, ჩვენ ვიპოვეთ ერთმანეთთან დასაბრუნებელი გზა.”
მადონამ ასევე აღნიშნა, რომ დედის გამოცხადებამ – რომელიც მან 5 წლის ასაკში დაკარგა – მას კრისტოფერთან ურთიერთობის მოგვარება შთააგონა. „ის ავად იყო, ჩემთან დაკავშირებას ცდილობდა იმის სათქმელად, რომ ჩემი დახმარება სჭირდებოდა. მე კი ვფიქრობდი: ‘ჩემს მტერს უნდა დავეხმარო?’ ასე ვგრძნობდი თავს. მაგრამ მე ეს გავაკეთე… და იმხელა ტვირთი მომეხსნა ზურგიდან. ტვირთი, რომელიც საბოლოოდ ჩამოვიშორე და შევძელი, ჩემს ძმასთან ერთად ერთ ოთახში ვყოფილიყავი და მისი ხელი მჭეროდა – მაშინაც კი, როცა კვდებოდა – და მეთქვა: ‘მიყვარხარ და გპატიობ’.”
მადონამ გასულ წელს დაასრულა Celebration Tour, მას შემდეგ, რაც მანამდე, აღნიშნული ჯანმრთელობის პრობლემების გამო, ტურნეს გადადება მოუწია. მომღერალი ღიად საუბრობს, თუ რამდენად რთული იყო რეაბილიტაციის პროცესი. ტურნეს ერთ-ერთ კონცერტზე მან ფანებს უთხრა, რომ ისიც კი არ იცოდა, შეძლებდა თუ არა კვლავ სიარულს.
„ეს ძალიან შემაშინებელი იყო. ცხადია, ოთხი დღის განმავლობაში არაფერი ვიცოდი, რადგან ხელოვნურ კომაში ვიყავი, მაგრამ როცა გავიღვიძე, პირველი სიტყვა, რაც ვთქვი, იყო ‘არა’, – ამბობდა მაშინ მომღერალი. „დარწმუნებული ვარ, ღმერთი მეკითხებოდა: ‘გინდა ჩვენთან წამოსვლა?’ და მე ვუთხარი ‘არა’.”
ნახეთ მადონას ინტერვიუ ჯეი შეტის პოდკასტში:
