Charli xcx-მა დაანონსებული ფილმის, „ქარიშხლიანი უღელტეხილის” რამდენიმე საუნდტრეკზე იმუშავა და პირველი მათგანი 10 ნოემბერს წარადგინა. House მომღერალმა მუსიკალურ ვიდეოსთან ერთად გამოაქვეყნა.
House-ის რეჟისორი მიტჩ რაიანია, რომელმაც ასევე იმუშავა Charli-ს ვიდეოზე – Party 4 U. კლიპში ასევე მონაწილეობს ჯგუფ Velvet Underground-ის ჯონ კეილი. ვიდეოში კეილის, როგორც მთხრობელის ხმა გვესმის, როცა Charli ცარიელ სახლში იღვიძებს. დრამატული ტექსტი თანხვედრაშია კლიპის გოთიკურ ესთეტიკასთან. ეს მკვეთრი გადახვევაა Brat-ის სამყაროს ქაოსისგან და Charli-ს მრავალფეროვან მუსიკალურ სპექტრს აჩვენებს.
33 წლის მომღერალმა განცხადება გაავრცელა, სადაც ფილმის საუნდტრეკებში თავის კონტრიბუციაზე ისაუბრა და ახსნა House-ის წარმომავლობა, რომელსაც „ელეგანტური და სასტიკი“ უწოდა.
„გასულ შობას რეჟისორმა ემერალდ ფენელმა დამირეკა და მკითხა, ვისურვებდი თუ არა მუშაობას „ქარიშხლიანი უღელტეხილის” ადაპტაციისთვის. სცენარი წავიკითხე და მყისიერად გაჩნდა შთაგონება, ამიტომ ფინ კეინთან ერთად მუშაობა დავიწყე არა მხოლოდ ერთ, არამედ მრავალ სიმღერაზე, რომლებიც მის [ემერალდ ფენელის] მიერ შექმნილ სამყაროსთან იყო დაკავშირებული. ჩემი წინა ალბომის შემდეგ, აღტაცებული ვიყავი სრულიად ახალ, სრულიად საწინააღმდეგო სამყაროში გადასვლით. როცა „ქარიშხლიან უღელტეხილზე” ვფიქრობ, მრავალი რამ მახსენდება: ვნებები და ტკივილი, ინგლისი, სიცივე, გამბედაობა და მტკიცე ხასიათი,” – ამბობს Charli xcx
„რამდენიმე წლის წინ ვუყურე დოკუმენტურ ფილმს The Velvet Underground-ის შესახებ. როგორც იცით, ჯგუფის დიდი ფანი ვარ და ფილმმა ძალიან დამაფიქრა. ერთი ფრაზა განსაკუთრებით დამამახსოვრდა: ჯონ კეილმა თქვა, რომ ჯგუფს სურდა, ნებისმიერი სიმღერა ყოფილიყო „ელეგანტური და სასტიკი”. ეს ფრაზა ჩემს გონებაში დაილექა, ჩავიწერე და ხანდახან ვფიქრობდი, თუ რას გულისხმობდა. როდესაც ამ ფილმისთვის მუსიკაზე ვმუშაობდით, მუდმივად ვფიქრობდი ფრაზაზე – „ელეგანტური და სასტიკი”. ერთ დღეს, ტურის დროს, ფინთან ერთად სტუდიაში მივედი და დავწერეთ სიმღერის ძირითადი ნაწილი, რომელიც საბოლოოდ გახდა House. ზაფხულის ბოლოს კი ისევ ჯონის სიტყვებზე ვფიქრობდი. ამიტომ გადავწყვიტე მასთან დაკავშირება და მისი მოსაზრების მოსმენა იმ სიმღერებზე, რომლებიც მისი ფრაზით იყო შთაგონებული და ასევე, იმის გასარკვევად, სურდა თუ არა მას ჩვენთან თანამშრომლობა. ჩვენ დავუკავშირდით, ვსაუბრობდით ტელეფონით და უცებ… ის ხმა – ელეგანტური და სასტიკი. რამდენიმე სიმღერა გავუგზავნე და კონკრეტულად House-ზეც ვილაპარაკეთ. მან ისეთი რამ ჩაწერა და გამომიგზავნა, რასაც მხოლოდ ჯონი შეძლებდა,” – გაიხსენა Charli xcx-მა.
„თავს იღბლიანად მივიჩნევ, რომ ჯონთან მუშაობის შესაძლებლობა მქონდა. ძალიან ველოდი თქვენთვის ამის გაზიარებას ,” – დაამატა მუსიკოსმა.
„ქარიშხლიანი უღელტეხილი” კინოთეატრებში 13 თებერვალს გამოვა. ფენელის ადაპტაციაში ჯეიკობ ელორდი და მარგო რობი მონაწილეობენ.
იხილეთ House-ის ვიდეო კლიპი:
