შერონ ოსბორნი Black Sabbath-ის ადრეული ჩანაწერების გამოქვეყნების წინააღმდეგია. მან საჯაროდ გააკრიტიკა ბენდის ყოფილი მენეჯერი ჯიმ სიმპსონი მის მიერ გავრცელებული პრესრელიზის შემდეგ, სადაც სიმპსონი ამტკიცებს, რომ ჩანაწერებზე იურიდიული უფლება სწორედ მას ეკუთვნის. საკითხი აქტუალური ოზი ოსბორნის გარდაცვალებიდან რამდენიმე თვეში გახდა.
სიმპსონმა, რომელიც ბენდის მენეჯერი იყო მათი კარიერის დასაწყისში, სანამ ჯერ კიდევ Black Sabbath-ს დაირქმევდნენ, 14 ნოემბერს განაცხადა, რომ 1969 წლის დემოჩანაწერების გამოცემას გეგმავს. კოლექცია, სახელწოდებით Earth: The Legendary Lost Tapes, თავდაპირველი პროგნოზით ივლისში უნდა გამოსულიყო. პროექტი ჯერ არ განხორციელებულა, თუმცა სიმპსონი ამტკიცებს, რომ მას ჩანაწერების გავრცელების უფლება აქვს.
შერონი ამ საკითხს ინსტაგრამის ვრცელი და დეტალური პოსტით გამოეხმაურა. პოსტი მოიცავს ორ „სქრინშოთს” 2 ივლისის მეილიდან, რომელიც, მისი თქმით, სიმპსონს გაუგზავნა და რომელშიც ყოფილ მენეჯერს აფრთხილებს, რომ პროექტი ბენდის თანხმობის გარეშე არ დაძრას.
„როგორც იცი, ბენდს არ სურს ამ ჩანაწერების გამოცემა, მით უმეტეს, რომ არც კი მოუსმენიათ, მიუხედავად შენი მტკიცებისა, რომ ისინი მათ დიდი ხნის წინ გაუგზავნე,” – წერს ოსბორნი. „შენ იცი, რომ Black Sabbath ასეთ რაღაცებს არ ეგუება და შეგიძლია დარწმუნებული იყო, რომ თუ ბენდის სურვილის წინააღმდეგ წახვალ, ჩვენ ნებისმიერ ზომას მივმართავთ იქ, სადაც მათი უფლებები დაირღვევა – აქაც და ამერიკაშიც.”
აღნიშნული დემოები მოიცავს ბენდის თავდაპირველი შემადგენლობის – ოზი ოსბორნი, ტონი იომი, გიზერ ბატლერი და ბილ უარდი – იმ ხანმოკლე პერიოდს, როცა ისინი Earth-ის სახელით უკრავდნენ. მიუხედავად იმისა, რომ იმ პერიოდის ჩანაწერები, უკვე დიდი ხანია, კოლექციონერების ინტერესის საგანია, ბენდი ისტორიულად მკაცრ კონტროლს ინარჩუნებდა ადრეულ კატალოგსა და არქივულ გამოცემებზე.
გასული კვირა ოსბორნების ოჯახისთვის ინციდენტებით დატვირთული აღმოჩნდა. მანამდე შერონმა და მისმა შვილებმა კელი და ჯეკ ოსბორნებმა საჯაროდ გააკრიტიკეს როჯერ უოტერსი მას შემდეგ, რაც The Independent Ink-თან ინტერვიუში Pink Floyd-ის თანადამფუძნებელმა ოზის შესახებ დამამცირებელი კომენტარები გააკეთა. შერონმა უოტერსს „ერთ-ერთი ყველაზე ავადმყოფი ადამიანი” უწოდა.
ამ ეტაპზე სიმპსონის პროექტი, როგორც ჩანს, შეჩერებულია, თუმცა შერონის პოსტი ერთგვარი სიგნალია ბენდის განზრახვისა, გაასაჩივროს ნებისმიერი გავრცელება, რომელიც მათთან არ იქნება შეთანხმებული. გადაუჭრელი იურიდიული საკითხებითა და გამოცემის თარიღის არარსებობით, ჩანაწერების მომავალი ჯერჯერობით კვლავ გაურკვეველი რჩება.
