ტიმოთე შალამე ჰოლივუდის წარმატებული მსახიობია, რომელიც ამჯერად აქტიურად არის ჩართული თავისი მომავალი ფილმის, Marty Supreme-ის კამპანიაში. თუმცა, მისი აქტიური სამსახიობო კარიერის პარალელურად, ზოგიერთ ფანს მიაჩნია, რომ ის საიდუმლოდ არის დაკავებული მეორე შემოქმედებითი საქმიანობით.
2024 წელს მუსიკალურ სცენაზე გამოჩნდა რეპერი – EsDeeKid, რომელიც ვინაობას მალავს და სახეს ბალაკლავით იფარავს. 2025 წლის მიწურულს ის სტრიმინგ პლატფორმებზე დიდ წარმატებას აღწევს, ამის მიზეზი კი კონსპირაციული თეორიაა, რომლის მიხედვითაც EsDeeKid ტიმოთი შალამეა. 11 ნოემბერს TikTok-ის მომხმარებელმა – @gothauntie0-მა გამოაქვეყნა ვიდეო, სადაც ამტკიცებდა, რომ EsDeeKid სინამდვილეში ტიმოთე შალამეა. მიუხედავად იმისა, რომ ეს მხოლოდ ვარაუდებია და რეალური საფუძველი არ აქვს, თეორიამ სოციალური ქსელები სწრაფად მოიცვა და არტისტით ბევრი მსმენელიც დაინტერესდა.
7-13 ნოემბრის კვირაში (როცა კონსპირაციიული ინფორაცია პირველად გავრცელდა) EsDeeKid-მა 5.8 მილიონზე მეტი ოფიციალური სტრიმი დააგროვა. მომდევნო კვირაში (14-20 ნოემბერი) ეს მაჩვენებელი 54%-ით გაიზარდა და 9 მილიონ სტრიმს გადააჭარბა. ბოლო სამი კვირის განმავლობაში ანდერგრაუნდ რეპერის კატალოგის მოსმენის ზრდის მაჩვენებელმა 145%-ს გადააჭარბა. ამის შედეგად მისი სადებიუტო ალბომი – Rebel, რომელიც ივნისში გამოიცა, Billboard 200-ზე დაწინაურდა და 131-ე ადგილზე მოხვდა.
ალბომის ორი ყველაზე ხმაურიანი ტრეკია 4 Raws და Phantom. 14-20 ნოემბერს 4 Raws-მა 3 მილიონზე მეტი ოფიციალური სტრიმი დააგროვა, რაც ბოლო სამი კვირის განმავლობაში 56%-იანი ზრდაა. Phantom-ის სტრიმებმა 2.98 მილიონს მიაღწია, რაც 53%-იანი ზრდაა. 31 ოქტომბერს EsDeeKid-მა გამოუშვა Century, რომელმაც 14-20 ნოემბერს 1.68 მილიონი სტრიმი მოიპოვა, ეს კი ორი კვირის განმავლობაში 156%-იანი მატებაა.
არც EsDeeKid-ს და არც ტიმოთე შალამეს გავრცელებულ კონსპირაციაზე კომენტარი არ გაუკეთებიათ, თუმცა, ამ ეტაპზე მათი დუმილი არტისტების, განსაკუთრებით კი EsDeeKid-ის სასარგებლოდ მუშაობს.
