მანანა დოიჯაშვილის სახელობის XXVII საერთაშორისო ფესტივალი – „საახალწლო მუსიკალური შეხვედრები“ უკვე ტრადიციულად კლასიკური მუსიკის საუკეთესო შემსრულებებს მასპინძლობს. ღონისძიებები 2-23 დეკემბერს თბილისის სახელმწიფო კონსერვატორიის დიდ დარბაზში გაიმართება.
ფესტივალი 1998 წელს კონსერვატორიის დიდი დარბაზის ადმინისტრაციის ინიციატივითა და გამორჩეული ქართველი პიანისტის, საქართველოს სახალხო არტისტის და მსოფლიო სამუსიკო საზოგადოების მიერ აღიარებული პროფესორის – მანანა დოიჯაშვილის თაოსნობით დაფუძნდა და 2023 წლიდან მის სახელს ატარებს.
ფესტივალის მთავარი მიზანი ქვეყანაში საშემსრულებლო და სასცენო ხელოვნების განვითარება, საკონცერტო ცხოვრების გააქტიურება, ჯაზის, ფოლკლორისა და კლასიკური მუსიკის პოპულარიზაცია და ამ დარგში წარმატებით მოღვაწე შემსრულებლების წარმოჩენაა; ასევე, საქართველოში თუ მის ფარგლებს გარეთ მცხოვრები ქართველი მუსიკოსების წარდგენა ქართველი აუდიტორიის წინაშე.
ერთ-ერთი ყველაზე პრესტიჟული, გამორჩეული და აკადემიური, მაღალი რანგის მუსიკალური ღონისძიება არსებობის თითქმის 28 წლის მანძილზე ქართულ და საერთაშორისო მუსიკალურ სივრცეში გამორჩეულ ადგილს იკავებს. მის მნიშვნელობას ნათლად წარმოაჩენს გამოჩენილი მუსიკოსების მონაწილეობა და მსოფლიო მუსიკალური სააგენტოების მუდმივი ინტერესი.
2025 წლის პროგრამა ექვს კონცერტს მოიცავს, სადაც მონაწილეობას როგორც ქართველი, ისე უცხოელი სახელოვანი მუსიკოსები მიიღებენ. ღონისძიებები 2, 10, 15, 17, 20 და 23 დეკემბერს გაიმართება.
გთავაზობთ ფესტივალის პროგრამას:
2 დეკემბერი, სამშაბათი, 20:00 – ჯაზის საღამო.
გონზალო რუბალკაბას ტრიო: გონზალო რუბალკაბა, ფორტეპიანო. რიკი როდრიგესი, ბასი – ერნესტო სიმფსონი, დასარტყამი.
10 დეკემბერი, ოთხშაბათი, 19:00 – საორგანო მუსიკის საღამო.
რომან კრასნოვსკი, უკრაინა/ისრაელი.
15 დეკემბერი, ორშაბათი, 19:00 – ვოკალური მუსიკის საღამო.
„ესპანური რიტმები“ – ქეთევან ქემოკლიძე, მეცო-სოპრანო, საქართველო;
დირიჟორი – ზაზა აზმაიფარაშვილი.
17 დეკემბერი, ოთხშაბათი, 19:00 – კამერული მუსიკის საღამო.
მარიო ბრუნელო, ჩელო, იტალია, გიორგი ვაჩნაძე, ფორტეპიანო, საქართველო/აშშ.
20 დეკემბერი, შაბათი, 19:00 – კამერული მუსიკის საღამო.
თბილისის სახელმწიფო კამერული ორკესტრი ,,საქართველოს სინფონიეტა“ , მარიო ბრუნელო, დირიჟორი, იტალია.
23 დეკემბერი, სამშაბათი, 19:00 – საფორტეპიანო მუსიკის საღამო.
კაცუნორი იშიი, იაპონია.
ფესტივალის ფარგლებში საკონცერტო დარბაზის ფოიეში წარმოდგენილი იქნება ფერმწერ უშანგი ხუმარაშვილის ნამუშევრები.
ფესტივალის მხარდამჭერები არიან: საქართველოს კულტურის სამინისტრო, ესპანეთის სამეფოს საელჩო საქართველოში, იტალიის საელჩო საქართველოში, სილქ ჰოსფითალითი. მედია პარტნიორები კი: საზოგადოებრივი მაუწყებელი, აჭარის საზოგადოებრივი მაუწყებელი, რადიო “ფორტუნა”, რადიო “პალიტრა”, ამბები.ჯი, “Billboard საქართველო” და yolo.ge.
ბილეთების შესაძენად ეწვიეთ ბმულს.
