Tatuza Jazz Club-ის სცენაზე 5 დეკემბერს, რობ კლირფილდის კვარტეტის გამოსვლის შემდეგ, ნოდარიკო ხუციშვილის კვინტეტი განსაკუთრებული პროგრამით წარდგება. Tatuza Jazz Club-ის სცენაზე ამ საღამოს ნოდარიკო ხუციშვილის კვინტეტის დებიუტი შედგება, რომლის შემადგენლობაში არიან: ნოდარიკო ხუციშვილი – ვოკალი, ლუკა თოფურია – ფორტეპიანო, ლუკა ქითიაშვილი – გიტარა, ხატია ქორიძე – ბასი და სოსო ცაგარეიშვილი – დრამი.
„ასეთ კლუბებში დაკვრა ყოველთვის ძალიან საინტერესოა და რაღაც სხვა, ჯადოსნური ფონი აქვს. დიდ ლაივებს კიდევ სხვანაირი ელფერი აქვს, მაგრამ ასეთ პატარა სივრცეში უფრო განსხვავებულად ჰყვები ამბავს. ძალიან დიდი მნიშვნელობა აქვს, ვისთან ერთად ჰყვები ამ ამბავს. ძალიან მიხარია, რომ ასეთი მაგარი მეგობრები და მუსიკოსები მეყოლება გვერდში, როგორიც არის ხატია ქორიძე, ლუკა თოფურია, ლუკა ქითიაშვილი, სოსო ცაგარეიშვილი.” – აღნიშნავს ნოდარიკო ხუციშვილი Tatuza Jazz Club-ის ინსტაგრამ გვერდზე გამოქვეყნებულ ვიდეოში.
ამავე საღამოს ნოდარიკო ხუციშვილის კვინტეტის გამოსვლამდე სცენას Tatuza Juzz Club-ის რეზიდენტი ბენდი – რობ კლირფილდის კვარტეტი დაიკავებს. ჩიკაგოს ჯაზსცენის გამორჩეული პიანისტი რობ კლირფილდი თანამედროვე ჯაზისა და ჰიპ-ჰოპის ელემენტების ნაზავით ინოვაციურ ჟღერადობას ქმნის. იგი ცნობილია მაკაია მაკკრეივენთან თანამშრომლობით, რომელიც ცნობილი ჯაზ დრამერია. ისინი ერთად ქმნიან მუსიკას, რომელიც ჯაზსა და თანამედროვე მუსიკას აერთიანებს.
Tatuza Jazz Club-ში 5 დეკემბრის საღამოზე დასასწრები ბილეთების შეძენა Tkt.ge-ზეა შესაძლებელი.
