7 წელზე მეტი გავიდა, რაც A$AP Rocky-მ 2018 წლის ალბომი, სახელწოდებით Testing გამოსცა. ამ დროის განმავლობაში მსმენელები ახალ ნამუშევარს – Don’t Be Dumb-ს ელოდნენ, რომელიც სტრიმინგის პლატფორმებზე 16 იანვარს გამოჩნდა.
როკის მეოთხე სტუდიურმა ალბომმა ჰიპ-ჰოპის სამყაროს 2026 წლის პირველი მასშტაბური რელიზი შესთავაზა. მიუხედავად იმისა, რომ ალბომში რიანა არ მონაწილეობს, პროექტი ვარსკვლავური კოლაბორაციებით გამოირჩევა. Don’t Be Dumb-ში ვხვდებით ისეთ არტისტებს, როგორებიც არიან: Tyler, The Creator, Doechii, Bossman Dlow, Brent Faiyaz, Gorillaz, ჯონ ბატისტი, Slay Squad, Thundercat, Westside Gunn და will.i.am.
ალბომი 15 ტრეკს აერთიანებს, მათ შორის უკვე გამოცემულ სინგლებს – Punk Rocky-ს, რომლის მუსიკალურ ვიდეოშიც ვაინონა რაიდერი მონაწილეობს და Helicopter-ს. გავრცელებული ინფორმაციით, პროექტის განმავლობაში როკი ექვს განსხვავებულ ალტერ ეგოსაც წარმოგვიდგენს.
პრესრელიზის მიხედვით, არტისტმა ალბომის ოფიციალურ გამოსვლამდე უკვე 130 000-ზე მეტი ერთეული გაყიდა.
Don’t Be Dumb-ის შექმნაში მნიშვნელოვანი როლი შეასრულა რეჟისორმა ტიმ ბარტონმა, რომელსაც როკიმ ალბომის ყდის წარდგენისას საჯაროდ გადაუხადა მადლობა. Don’t Be Dumb-ის ყდა სწორედ ბარტონის მიერ არის შექმნილი.
ჯერჯერობით უცნობია, გეგმავს თუ არა არტისტი ალბომის მხარდამჭერ მსოფლიო ტურნეს, თუმცა უკვე დადასტურებულია, რომ 7 ივნისს ნიუ-იორკში Governors Ball 2026-ის ჰედლაინერი იქნება.
ახალი ალბომის კომპოზიციებს როკი ასევე ასრულებს Amazon Music-ის სპეციალურ პროექტში Songline, რომელიც ნიუ-იორკის სხვადასხვა ლოკაციაზე გადაიღეს. ვიზუალური ნამუშევრის პრემიერა 18 იანვარს შედგება. Songline-ის ახალი ეპიზოდი ექსკლუზიურად Amazon Music-ზე, Prime Video-სა და Twitch-ზე იქნება ხელმისაწვდომი.
მოუსმინეთ A$AP Rocky-ს ალბომს – Don’t Be Dumb:
