შოტლანდიელი მომღერალი და სიმღერების ავტორი ჯეიკობ ალონი 2026 წლის BRIT Awards-ის ნომინაციის – „კრიტიკოსთა რჩეულის“ (Critics’ Choice) გამარჯვებული გახდა. ეს პრესტიჟული ჯილდო იმ არტისტებს გადაეცემათ, რომლებიც კარიერის ადრეულ ეტაპზე იმყოფებიან.
აღნიშნული ნომინაცია 2008 წელს დაარსდა და მისი პირველი მფლობელი ადელი გახდა. სხვადასხვა დროს ჯილდო მიღებული აქვთ: Florence + the Machine-ს (2009), ელ გოლდინგს (2010), სემ სმითს (2014) და სხვა არტისტებს.
2020 წლიდან ნომინაციას „ამომავალი ვარსკვლავის“ (Rising Star) სახელით იცნობდნენ, თუმცა 2026 წლის ცერემონიისთვის მას ძველი სახელი – „კრიტიკოსთა რჩეული“ დაუბრუნდა. წესების თანახმად, 2025 წლის 31 ოქტომბრისთვის ბრიტანეთის ოფიციალური ჩარტების ტოპ-20-ში არ უნდა იყოს არტისტის ერთზე მეტი სინგლი ან თუნდაც ერთი ალბომი. გამარჯვებულს BRIT-ის აკადემიის 1200 წევრი ირჩევს.
ალონი ჯილდოს 28 თებერვალს გამართულ საზეიმო ცერემონიაზე მიიღებს. ღონისძიება მანჩესტერის Co-op Live-ის სტადიონზე ჩატარდება. დაჯილდოების თითქმის 50-წლიან ისტორიაში ეს პირველი შემთხვევაა, როდესაც შოუ ლონდონის ფარგლებს გარეთ გაიმართება.
„დიდი მადლობა კრიტიკოსებს ჩემი შემოქმედების დაფასებისთვის! შოტლანდიის იმ პატარა ქალაქში, სადაც გავიზარდე, ხშირად ისეთი შეგრძნება გეუფლება, რომ ოცნებებს საზღვარი აქვს. ამიტომ, ასეთი მოვლენის ნაწილად ყოფნა მაგრძნობინებს, თითქოს ცაში დავფრინავ,“ – განაცხადა მომღერალმა.
ალონის სადებიუტო ალბომმა – In Limerence, რომელიც 2025 წლის მაისში გამოვიდა, კრიტიკოსთა დიდი მოწონება დაიმსახურა. ჩანაწერი წარდგენილი იყო Mercury Prize-ზე და ასევე მოხვდა Billboard U.K.-ის 2025 წლის საუკეთესო ალბომების სიაში.
ელტონ ჯონმა თავის რადიოგადაცემაში, სახელწოდებით Rocket Hour, არტისტი ასე შეაქო: „დიდი ხანია, მსგავსი ჟღერადობა არავისგან მომისმენია. დიდი მომავლისთვის ხარ დაბადებული!“
Billboard U.K.-სთან ინტერვიუში 24 წლის მომღერალმა ისაუბრა იმ სირთულეებზე, რაც მოზარდობისას გადაიტანა, მათ შორის საკუთარი იდენტობის მიღებასა და პერიოდზე, როდესაც თითქმის უსახლკაროდ იყო დარჩენილი. სწორედ ამ გამოცდილებამ მოახდინა გავლენა ალბომის – In Limerence-ის სიმღერებზე. „ვამაყობ საკუთარი თავით, რომ არასდროს დავნებებულვარ. რთულია არსებობა სამყაროში, სადაც ამდენი ტკივილია,“ – აღნიშნა არტისტმა.
დაჯილდოების ცერემონიას მეექვსედ გაუძღვება კომიკოსი ჯეკ უაითჰოლი. ნომინანტებისა და სხვა შემსრულებლების სრული სია უახლოეს კვირებში გახდება ცნობილი.
