ადამიანი∞სამყარომ (დაჩი ხასაია) ახალი, რიგით მეექვსე ალბომი გამოსცა, სახელწოდებით „ჰანამი.” მუსიკოსი პროექტზე ერთი წლის განმავლობაში მუშაობდა. ალბომი იაპონიას, მის კულტურასა და ცნობილ ქალაქებს: ტოკიოს, ოსაკასა და კიოტოს ეძღვნება.
დაჩი ხასაია:
„იაპონიაში ერთი წლის წინ ვიმოგზაურე. იქ ორი კვირა დავყავი და ვერც კი წარმოვიდგენდი, რომ ეს მოგზაურობა ჩემს ახალ ალბომს შექმნიდა. წლების განმავლობაში მსურდა იაპონიაში მოგზაურობა და ჩემი საყვარელი ადგილების ნახვა, რომლებსაც მანამდე მხოლოდ იუთუბით ვიცნობდი. და როცა ეს ყველაფერი რეალობად იქცა და ყველა იაპონური ოცნება ავისრულე, უბედნიერესი და ამავდროულად სასიამოვნოდ გაკვირვებული ვიყავი იმ ახალი, სრულიად სხვა სამყაროთი და კულტურით, რაც იქ დამხვდა. იაპონელები არაჩვეულებრივი ხალხია, ძალიან გემოვნებიანი. იქ ყოველდღე რაღაც ახალს, ლამაზსა და განსაკუთრებულს აღმოაჩენ და სწორედ ეს არის ის იაპონური ხიბლი, რისი განცდაც ყველა ტურისტს სურს. ბელგიაში დაბრუნებულს, თავიდან არ ამომდიოდა იაპონური მოგონებები. ამიტომ ვიფიქრე, რადგან მუსიკოსი ვარ და მაქვს ძალა, რომ ყველა ჩემი მოგონება სიმღერებში უკვდავყო, ამ შემთხვევაშიც ასე მოვიქცევი-მეთქი. ასე დაიწყო ჩემი მეექვსე ალბომის დაბადება.”
ალბომის სახელწოდებაც იაპონიიდან, კონკრეტულად კი იაპონური ტრადიციიდან მოდის. ჰანამი გაზაფხულის დღესასწაულია, როცა ადამიანები საკურას ყვავილობას აღნიშნავენ.
„ჰანამი” ჩემი იაპონური მოგზაურობის ერთგვარი რუკაა. ის არის ჩემს განცდებსა და იქ გატარებულ დროზე. მიხარია, რომ მსმენელმა ზუსტად იგრძნო ის, რაც მე ჩავიფიქრე. ჩემი მიზანი იყო, რომ ვინც ჯერ კიდევ ვერ მოახერხა იაპონიაში მოგზაურობა, იქ ჩემთან ერთად ესეირნა, ხოლო ვინც უკვე ნამყოფია ამ ქვეყანაში, იქ გატარებული ლამაზი დღეები გაეხსენებინა. ჰანამი, აყვავებული ხეები, იაპონური აპრილი, ტოკიოს ქუჩები, კაბუკის თეატრი, იმპერატორის ბაღები, ოსაკას ბრწყინვალება, კიოტოს სიდიადე, ბამბუკის ტყეებში მარტო სიარული… ყველაფერი ერთ ალბომში ვერ ჩაეტია, მაგრამ ვეცადე, რომ ჩემი მოგონებები 11 სიმღერაში მომექცია. დარწმუნებული ვარ, ალბომის მოსმენისას მსმენელი აუცილებლად იგრძნობს ჰანამის სიოს. თავად ალბომს მოკლე, მაგრამ ღირებული სათქმელი აქვს: „სუნთქვის შენელება, ბუნებაში ჩაძირვა, წამიერი შეგრძნება, შიგნიდან განათება… საკურა, როგორც სიცოცხლის სიმბოლო, რომელიც დაცვენის შემდეგაც კი, აქ და ახლა, მარადისობას ეხუტება.”
დაჩი ხასაია წლების განმავლობაში ბელგიაში ცხოვრობდა და საქმიანობდა. სულ ცოტა ხანია, რაც საქართველოში დაბრუნდა და კარიერის გაგრძელებას უკვე სამშობლოში გეგმავს. უახლოეს მომავალში მუსიკოსი მეგობრებთან ერთად კონცერტის გამართვასაც აპირებს.
მოუსმინეთ ალბომს „ჰანამი”:
