25 ივნისს HBO-მ დოკუმენტური სერიალის JAŸ-Z in 8-ის მომავალი პრემიერის შესახებ განაცხადება გაავრცელა. პროექტი, ეკრანებზე ამ წლის შემოდგომაზე გამოვა.
სტრიმინგ პლატფორმამ განცხადებასთან ერთად სერიალის პირველი ტრეილერიც გამოუშვა, რომლის რეჟისორიც ლეგენდარული მუსიკალური პროდიუსერი რიკ რუბინია.
შავ-თეთრ კადრში Jay-Z და 99 Problems-ის პროდიუსერი რიკ რუბინი ერთმანეთს ძველი ბერძნული არქიტექტურის ელემენტებით გაფორმებულ სივრცეში ესაუბრებიან, რომელიც ერთი შეხედვით ხელოვნების მუზეუმს ჰგავს.
„ყველას ერთი და იგივე გამოცდილება ჰქონდა, უბრალოდ მე ის ადამიანი აღმოვჩნდი, რომელსაც შეეძლო შემაღლებულ ტრიბუნაზე დამდგარიყო და ის ყველაფერი, რასაც ჩვენ ყველანი განვიცდით, ამ სიტყვებით გადმოეცა.” – ამბობს Jay-Z ვიდეოში.
რიკ რუბინი კი პასუხობს: „ტკივილის გარეშე ამ სამუშაოს ვერ შეასრულებდი“.
არტისტი კი თვლის, რომ ტკივილის სასიკეთოდ გამოყენება შესაძლებელია: „არ ვიტყოდი, რომ ტკივილი აუცილებელია ან რომ მისი განცდა საჭიროა. მაგრამ თუ ის უკვე არსებობს, შენს სასიკეთოდ უნდა გამოიყენო.“ – ამბობს Jay-Z.
ფორმატით JAŸ-Z in 8 – 2021 წელს გამოსულ დოკუმენტურ მინისერიალს McCartney 3, 2, 1 ჰგავს, რომელშიც რიკ რუბინი პოლ მაკარტნისთან ერთად მისი მუსიკალური კარიერისა და შემოქმედების შესახებ საუბრობს.
პრესრელიზის თანახმად, HBO-ს დოკუმენტურ სერიალში Jay-Z და რიკ რუბინი არტისტის შემოქმედებით გზას, სიმღერების ტექსტებს, ცხოვრების გამოცდილებასა და მუსიკის შექმნის პროცესს განიხილავენ.
სერიალის აღმასრულებელი პროდიუსერები თავად Jay-Z, ოსკაროსანი მსახიობი დენიელ კალუია და რეჟისორი რიკ რუბინი არიან.
სიმბოლურია ისიც, რომ პროექტის ანონსი სწორედ იმ დღეს გავრცელდა, როდესაც Jay-Z-ის სადებიუტო ალბომის, Reasonable Doubt-ის გამოსვლიდან 30 წელი შესრულდა. ალბომი 1996 წლის 25 ივნისს გამოვიდა და Billboard 200-ის ჩარტში 23-ე ადგილს მიაღწია, სადაც 18 კვირა დაჰყო.
სადებიუტო ალბომის 30 წლის იუბილეს აღსანიშნავად, Jay-Z-ის მიერ დაფუძნებულმა გასართობმა კომპანია Roc Nation-მა ნიუ-იორკში, ბრუკლინსა და მანჰეტენზე სპეციალური pop-up სივრცეები და ინსტალაციები მოაწყო. დამთვალიერებლებს შესაძლებლობა მიეცათ, ექსკლუზიური პროდუქცია და კულტურული არქივი ეხილათ, რომელიც Jay-Z-ის ორ ყველაზე მნიშვნელოვან ალბომს: Reasonable Doubt-ის (1996) და The Blueprint-ის (2001) ისტორიასა და მემკვიდრეობას ეძღვნებოდა.
ნახეთ JAŸ-Z in 8-ის ტრეილერი.
