საერთაშორისო თეატრალური ფესტივალის ფარგლებში თბილისს თეატრისა და ოპერის ცნობილი ამერიკელი რეჟისორი რობერტ ვილსონი ეწვევა. ვილსონი მაყურებელთან და პროფესიონალებთან შეხვედრას 18 სექტემბერს „თეატრ სახელოსნო 42-ში” გამართავს.
ვილსონის სპექტაკლები გამოირჩევა ექსპერიმენტებით, სხეულის ენით, სცენოგრაფიითა და განათებით. რეჟისორი ასევე ცნობილია მისი ხანგრძლივი დადგმებით. მაგალითისთვის, ოპერა სახელწოდებით The Life and Times of Joseph Stalin 12 საათი მიმდინარეობდა. ხოლო წარმოდგენა KA MOUNTain and GUARDenia Terrace, რომელიც რეჟისორმა ირანში, ერთ-ერთ მთაზე გამართა, 7 დღის განმავლობაში გრძელდებოდა. „ექსპერიმენტული თეატრის უმნიშვნელოვანესი ფიგურა, სცენაზე დროისა და სივრცის ნამდვილი მკვლევარი,” – ასე უწოდებს ვილსონს გამოცემა New York Times.
თამუნა ლალიაშვილი – თბილისის საერთაშორისო თეატრალური ფესტივალის საზოგადოებასთან ურთიერთობის მენეჯერი:
„რობერტ ვილსონის სტუმრობა ფესტივალისთვის დიდი პატივია. წლების განმავლობაში მიმდინარეობდა მოლაპარაკება მისი სხვადასხვა სპექტაკლის ჩამოტანასთან დაკავშირებით და, როგორც იქნა, წელს რობერტ ვილსონის „ქარიშხალი” ფესტივალის მონაწილე იქნება. 18 სექტემბერს კი, 13:00 საათზე, „თეატრ სახელოსნო 42-ში” რეჟისორთან შეხვედრა გაიმართება. შეხვედრა კითხვა-პასუხის რეჟიმში ჩატარდება და შედგება საუბარი როგორც სპექტაკლის, ასევე ზოგადად მისი შემოქმედების ირგვლივ. მსგავსი შეხვედრები უმნიშვნელოვანესია, რადგან მაყურებელს სპექტაკლის ნახვის შემდეგ შესაძლებლობა აქვს, პირადად შეხვდეს ლეგენდარულ რეჟისორს და დაუსვას კითხვები.”
