საკულტო ალბომის, Get Behind Me Satan-ის გამოცემიდან 20 წლის შემდეგ The White Stripes მის საიუბილეო გამოცემას Get Behind Me Satan XX-ს გამოუშვებს. საიუბილეო ნაკრებს ჯეკ უაიტის ხმის ჩამწერი ლეიბლი Third Man Records გამოსცემს.
„ალბომს ყველაზე ზუსტად თავად ჯეკ უაიტის სიტყვები აღწერს – სიმართლეზე ფოკუსირებული,” – ნათქვამია Third Man Records-ის მიერ გავრცელებულ განცხადებაში. „ოცი წელი გავიდა და ის მაინც გამოირჩევა თავისი ცოცხალი და მარადიულ ჟღერადობით. კომერციული წარმატების პირისპირ, არც ერთ თანამედროვე როკბენდს არ ჰყოფნია გამბედაობა, თავის არსენალში მანდოლინა, ტიმპანი, ხელის ზარები და მარიმბა შეეტანა და მარტო გამგზავრებულიყო ცენტრალური ამერიკისა და აღმოსავლეთ ევროპის ტურებში. White Stripes უნიკალური იყო. ისინი არავის ჰგავდნენ. ხოლო ის, რაც ახლა განსაკუთრებით მომხიბვლელია, არის ის განსხვავებული ძაფები, რომლებიც შეერთდა და Satan ასეთი ცოცხალი გახადა.”
ახალი პროექტის პირველი დისკში ალბომის აქამდე გამოუქვეყნებელი დემოები შევა. მეორე დისკი კი მოიცავს ასევე გამოუქვეყნებელ ლაივ ჩანაწერებს ალბომის 2005 წლის ტურნედან. ნაკრებს მოჰყვება DVD დისკიც, რომელზეც White Stripes-ის ცენტრალური და სამხრეთ ამერიკის ტურნეს ვიდეომასალაა ჩაწერილი.
„მინი კამერითა და სრული თავისუფლებით აღჭურვილი დევიდ ჯეიმს სვანსონი White Stripes-თან ერთად იმყოფებოდა ცენტრალური და სამხრეთ ამერიკის 2005 წლის ტურნეში,” – წერს Third Man Records. „საუნდჩეკი, გავეშებული ფანების სიმღერა – ეს ყველაფერი აღბეჭდილია. მაშინ, როცა ზედმეტად გრანდიოზული იქნებოდა, ამ მასალისთვის „ფილმი” გვეწოდებინა, სიქვენსების ეს ნაკრები, რომლებიც აქა-იქ არის გადაღებული, არის გამოძახილი იმ უნიკალური და ქაოსური დროისა, რომელშიც White Stripes იმ პერიოდში ცხოვრობდა.”
2005 წელს გამოცემული White Stripes-ის მეხუთე ალბომი Get Behind Me Satan მესამე ადგილზე გავიდა Billboard 200-ში, მომდევნო წელს კი გრემის მფლობელი გახდა საუკეთესო ალტერნატიული ალბომის ნომინაციაში.
