მადონამ საჯაროდ გააკრიტიკა დონალდ ტრამპის ადმინისტრაცია ტრანსგენდერი პირების წინააღმდეგ მიღებული გადაწყვეტილებების გამო. ამ გადაწყვეტილებებს შორის არის ტრანსგენდერი ადამიანებისთვის სამხედრო სამსახურში შესვლის აკრძალვა და ასევე ახალგაზრდებისთვის განკუთვნილი გენდერული სამედიცინო მომსახურების დაფინანსების შეწყვეტა.
„სამწუხაროა იმის ყურება, როგორ ანგრევს ჩვენი ახალი მთავრობა იმ თავისუფლებას, რომლისთვისაც წლების განმავლობაში ვიბრძოდით და რომელიც მოვიპოვეთ,“ – დაწერა მადონამ სოციალურ ქსელ X-ზე. მიუხედავად იმისა, რომ არტისტს არ დაუკონკრეტებია, რაზე საუბრობდა, მან პოსტს გატეხილი გულისა და ქვიარ თემის დროშის ე.წ. ემოჯიებიც დაურთო. „ნუ დანებდებით ბრძოლაში!“ – წერს ამავე პოსტში მადონა.
It’s so sad to watch our new Government slowly dismantling all the Freedoms we have been fighting for and WON over the years. 🏳️🌈💔
— Madonna (@Madonna) January 28, 2025
Don’t give up the Fight! pic.twitter.com/6FiziYa2zM
მადონა წლების განმავლობაში ღიად გამოხატავდა უკმაყოფილებას ტრამპის პოლიტიკის მიმართ. ნოემბერში ჩატარებული არჩევნების შემდეგ მან ინსტაგრამის ისტორიაში გააზიარა ტორტის ფოტო, რომელზეც ეწერა „F— Trump“. ტორტის ფოტოს შემდეგ მადონამ ე.წ. სელფი გამოაქვეყნა, რომელსაც შემდეგი აღწერა დაურთო: „ვცდილობ გავიაზრო, რატომ აირჩია ქვეყანამ დამნაშავე, მოძალადე, რასისტი პრეზიდენტად მხოლოდ იმიტომ, რომ ის ეკონომიკისთვის კარგია.“
მომღერალმა გამოაქვეყნა კიდევ ერთი პოსტი აღწერით : „დღეს დილით პირველი აზრი, რაც თავში გამიჩნდა, იყო – ამერიკას ქალები ეზიზღება!” არტისტის თქმით, ამერიკაში თავისუფლება პირდაპირი მნიშვნელობით სძულთ. „დაბალი გადასახადები უნდათ, მაგრამ იმაზე არ დარდობენ, თუ ამისთვის ტოტალიტარულ რეჟიმში მოუწევთ ცხოვრება. არ მინდა, ჩვენი დემოკრატია დავთმოთ! ახლა კიდევ უფრო მეტად მოგვიწევს ბრძოლა მის შესანარჩუნებლად. ამერიკელებმა, რომლებმაც ტრამპს მისცეს ხმა, ან საერთოდ არ მიიღეს არჩევნებში მონაწილეობა, აჩვენეს, რომ მათთვის დიქტატურა მისაღებია. არ მინდა, ჩემმა მეგობრებმა, რომლებიც ამერიკაში არ დაბადებულან, საკონცენტრაციო ბანაკებში იცხოვრონ! მინდა, რომ ჩემმა ქალიშვილებმა და მათმა მეგობრებმა თავად განკარგონ თავიანთი სხეული! მსურს, რომ დაფასებულად იგრძნონ თავი და არა – მეორე ხარისხოვან მოქალაქეებად. როგორ შეეძლოთ ქალებს, ტრამპისთვის მიეცათ ხმა? ჩვენ ხომ წლების განმავლობაში ამდენს ვიბრძოდით!“
