ლონდონში, „მადამ ტიუსოს” მუზეუმში მომავალი თებერვლიდან დამთვალიერებლებს Lady Gaga-ს ახალი ცვილის ფიგურა დახვდებათ. ფიგურის ვიზუალი შთაგონებულია იმიჯით, რომლითაც ლედი გაგა 2022 წლის გრემის დაჯილდოების ცერემონიაზე წარდგა. სკულპტურას Armani Privé-ს კლასიკური შავ-თეთრი კაბის რეპლიკა აცვია. ფიგურა სიმბოლურად ეხმიანება წლევანდელ გრემის ღონისძიებასაც, სადაც გაგას ჰიტი Die With a Smile ორ ნომინაციაშია წარდგენილი.
ლედი გაგას ახალი ცვილის ფიგურა „მადამ ტიუსოს” მუზეუმის ლონდონის ფილიალის ე.წ. Awards Party ზონაში განთავსდება. ამავე სივრცეში განთავსებულია ისეთ ვარსკვლავების ცვილის სკულპტურები, როგორებიც არიან: ტიმოთე შალამე, ჰარი სტაილსი, ზენდეია, დუეინ ჯონსონი, პრიანკა ჩოპრა ჯონასი და Lil Nas X.
„ათწლეულების განმავლობაში ლედი გაგა დომინანტ როლს ასრულებს მუსიკაში, მოდასა და ბოლოს უკვე კინოშიც. სწორედ ამიტომ გვინდოდა, ისეთი ფიგურა შეგვექმნა, რომელიც ასახავს მის საკულტო სტატუსსა და შესაძლებლობას, მუდმივად ტრანსფორმირდეს,“ – აღნიშნა „მადამ ტიუსოს” ლონდონის მუზეუმის გენერალურმა მენეჯერმა, სტივ ბლექბერნმა გამოქვეყნებულ პრესრელიზში. „შთაგონებული ვართ მისი უნარით, თავიდან გამოიგონოს საკუთარი თავი. გადავწყვიტეთ ჩვენც გაგვეახლებინა მისი ფიგურა მას შემდეგ, რაც 15 წლის წინ პირველი სკულპტურა წარვადგინეთ.”
სტივ ბლექბერნის თქმით, ეს იქნება შესაძლებლობა გაგას ფანებისა და მუზეუმის სხვა დამთვალიერებლებისათვის, რომ წითელ ხალიჩაზე ვარსკვლავთან ერთად აღმოჩნდნენ.
„მადამ ტიუსოს“ მუზეუმის ლონდონის ფილიალში ეს ლედი გაგას მეორე ცვილის ფიგურაა. სკულპტურა მუზეუმის სივრცეში საჯაროდ განთავსდება 3 თებერვლიდან – გრემის 67-ე დაჯილდოების ცერემონიის მეორე დღეს.
