მადონა და გაი ოსირი უძღვებოდნენ ოსკარების ყოველწლიურ წვეულებას, რომელმაც, როგორც ყოველთვის, დაჯილდოების გამარჯვებულები და ჰოლივუდის ყველაზე დიდი სახელები გააერთიანა.
ვარსკვლავებით დატვირთული ღონისძიების კადრები პოპის დედოფალმა ინსტაგრამზე გააზიარა. ფოტოებში მადონა წვეულების სტუმრებთან ერთად პოზირებს, მათ შორის არიან მიკ ჯაგერი და ჯულია გარნერი, რომელმაც, გავრცელებული ინფორმაციით, სწორედ მადონა უნდა განასახიეროს მასზე გადასაღებ ბიოგრაფიულ ფილმში.
„ოსკარების ყოველწლიური წვეულება დიდი გამოწვევაა, სტრესული და ბევრი დროის წამღები. მაგრამ საბოლოოდ ყოველთვის წარმატებით ვართმევთ თავს,” – წერს მადონა პოსტზე. „დრო გავატარე ადამიანებთან, რომლებიც მიყვარს და რომლებსაც ვაღიარებ!! ჩემთვის განსაკუთრებული მომენტი იყო ჩემი საყვარელი ფილმის, Emilia Perez-ის რეჟისორ ჟაკ ოდიარის გვერდით ჯდომა, მისი ოსკარის ხელში ჭერა და Lil Wayne-ის გამოსვლის ყურება!!!”
წვეულების კადრები გამოაქვეყნა ასევე ფოტოგრაფმა JR-მ, რომელმაც ფოტოსტუდიაში გადაიღო სერია, სახელწოდებით Paper Portrait Série. ქაღალდის თვალების წვიმაში გადაღებულ ფოტოებში წარმოდგენილი არიან საუკეთესო მსახიობის ნომინაციაში გამარჯვებული ედრიენ ბროუდი და საუკეთესო ქალი მსახიობის ჯილდოს მფლობელი მაიკი მედისონი, რომელთაც ხელში ოსკარები უჭირავთ; ასევე ოსკარის მფლობელი ქალის მეორეხარისხოვანი როლისთვის ზოი სალდანა და სხვა ვარსკვლავები.
გავრცელებული პრესრელიზის თანახმად, Capital One-ისა და „გუჩის” მიერ დასპონსორებული წვეულების თემა იყო A Night in Japan, რომლის შთაგონებაც მადონას ბოლოდროინდელი მოგზაურობები გახდა. ღონისძიების დეკორაციაც სწორედ ტრადიციული იაპონურ სტილში იყო გადაწყვეტილი.
