Ye (ყოფილი კანიე უესტი) კვლავ მწვავე კრიტიკის სამიზნე გახდა მას შემდეგ, რაც სკანდალური ტრეკის, Heil Hitler-ის გამოშვება სცადა. 8 მაისს, ნაცისტური გერმანიის კაპიტულაციის დღეს, ტრეკი სტრიმინგ სერვისებიდან და ციფრული დისტრიბუციის პლატფორმებიდან აიღეს. ამის შემდეგ ებრაელთა უფლებადამცველი საერთაშორისო ორგანიზაციის – Simon Wiesenthal Center-ის ხელმძღვანელმა ჯიმ ბერკმა Billboard-ს განცხადება გაუგზავნა, რომელშიც უესტის ქმედების გამო აღშფოთება და იმედგაცრუება გამოხატა.
„ნაცისტური გერმანიის კაპიტულაციის დღეს კანიე უესტის მიერ სიმღერა Heil Hitler-ის გამოშვება სიძულვილის ენის პირდაპირი გამოვლინებაა. ეს სიმღერა იმ საზიზღარ გზავნილებს იმეორებს, რაც უესტისგან უკვე აღარ გვიკვირს,” – განაცხადა ბერკმა.
ჯიმ ბერკის გაღიზიანება ამით არ ამოწურულა – მან ყურადღება გაამახვილა ილონ მასკის სოციალურ პლატფორმა X-ზეც, რომელმაც, ბერკის თქმით, Ye-ს და სხვებს სიძულვილის ენის გავრცელების საშუალება მისცა.
„ებრაელების წინააღმდეგ ამ სახიფათო გზავნილების გავრცელებაში მისი [კანიე უესტის] ხელშემწყობი არის პლატფორმა X, რომელიც თავადვე არღვევს საკუთარ წესებს, სადაც ნათლად წერია: თქვენ არ შეგიძლიათ პირდაპირ შეუტიოთ ადამიანებს რასის, ეთნიკური კუთვნილების, ეროვნული წარმომავლობის, კასტის, სექსუალური ორიენტაციის, სქესის, გენდერული იდენტობის, რელიგიური მიკუთვნებულობის, ასაკის, შშმ სტატუსის ან მძიმე დაავადების საფუძველზე. მოვუწოდებთ X-ს, წაშალოს უესტი პლატფორმიდან, ხოლო დანარჩენ პლატფორმებსა და დისტრიბუტორებს – უარი თქვან ამ სიმღერის განთავსებასა და მონეტიზაციაზე. აუცილებელია მკაფიო ზღვრის გავლება, როცა გენოციდური რეჟიმების განდიდებას ეხება საქმე, განსაკუთრებით კი მაშინ, როცა ამას მილიონობით ახალგაზრდა უსმენს.“
მას შემდეგ, რაც ციფრული სერვისების პლატფორმებმა უარი თქვეს ტრეკის განთავსებაზე, უესტმა ჩანაწერი SoundCloud-ზე ატვირთა, თუმცა იქიდანაც მალევე წაიშალა. ამის შემდეგ რეპერმა თავისი პოზიცია სოციალურ ქსელ X-ზე დააფიქსირა: „ტრეკი – Heil Hitler ყველა ციფრულ სტრიმინგ პლატფორმაზე აკრძალეს. ამავე დროს, რენდი ნიუმანის სიმღერა Rednecks კვლავ ხელმისაწვდომია. ისინი პირდაპირ ზურგს უმაგრებენ შავკანიანების ჩაგვრას.“
Heil Hitler უესტმა წარსულში რამდენჯერმე დააანონსა. სხვადასხვა თემასთან ერთად, ტრეკის ტექსტი მოიცავს ბავშვებზე მეურვეობის საკითხებს. ამ ნაწილში რეპერი საკუთარ გამოცდილებას და ყოფილ მეუღლესთან, კიმ კარდაშიანთან დაძაბულ ურთიერთობას ეხება.
