25 აგვისტოს ტეილორ სვიფტმა თავისი მე-12 ალბომის ლიმიტირებული ვინილის მორიგი ვერსია წარადგინა. ახალი გამოცემა, სახელწოდებით – Tiny Bubbles in Champagne მოიცავს ექსკლუზიურ ყდას: ფოტოზე თავად სვიფტია აღბეჭდილი, რომელსაც ბუმბულებით გაფორმებული სასცენო კოსტიუმი აცვია.
Tiny Bubbles in Champagne დაანონსებული ალბომის მე-3, ლიმიტირებული ვინილია. სრული ალბომი, სახელწოდებით The Life of a Showgirl 3 ოქტომბერს გამოვა. ვინილები სხვადასხვა ფერის შეფუთვაშია წარმოდგენილი. როგორც წინა ორი გამოცემის შემთხვევაში, Tiny Bubbles in Champagne წინასწარი შეკვეთით ხელმისაწვდომია სვიფტის ოფიციალურ ვებ-გვერდზე.
ისევე, როგორც წინა კვირას გამოქვეყნებული და უკვე სრულად გაყიდული ვერსიები, ახალი ვინილიც მოიცავს ექსკლუზიურ ფოტოებსა და პოეზიას. მისი შეკვეთა შესაძლებელი იქნება წარდგენიდან 48 საათის განმავლობაში, მარაგების ამოწურვამდე.
Tiny Bubbles in Champagne სვიფტის Showgirl-ის კამპანიის მორიგი მნიშვნელოვანი ეტაპია. ოფიციალურად ყველაფერი 12 აგვისტოს დაიწყო, როცა მომღერალმა ალბომი ტრევის კელსისა და მისი ძმის, ჯეისონ კელსის პოდკასტის თიზერში დააანონსა. მეორე დღეს სრული ეპიზოდიც გამოქვეყნდა, რომელშიც მომღერალმა ალბომის ყდა, ტრეკლისტი და გამოსვლის თარიღი გაასაჯაროვა. სვიფტმა ასევე გაამხილა, რომ ალბომში შესულია ერთადერთი კოლაბორაცია – დუეტი საბრინა კარპენტერთან.
სვიფტმა ასევე აღნიშნა, რომ Showgirl-ის 12 სიმღერაზე მხოლოდ ის და პროდიუსერები – მაქს მარტინი და Shellback მუშაობდნენ. „[ალბომი] ბევრად უფრო ენერგიულია და მეტი სახალისო პოპ-ემოცია მოაქვს. ჩემი მთავარი მიზანი იყო, შემექმნა ისეთი მელოდიები, რომლებიც იმდენად გადამდებია, რომ ცოტათი გაღიზიანდები კიდეც,” – აღნიშნა სვიფტმა პოდკასტში.
The Life of a Showgirl იქნება ტეილორ სვიფტის პირველი სრული ალბომი 2024 წლის The Tortured Poets Department-ის შემდეგ, რომელიც Billboard 200-ის ჩარტში 17 კვირის განმავლობაში პირველ პოზიციას იკავებდა.
