ლედი გაგას ფანების დიდი გამოხმურება მოჰყვა სიახლეს, რომელიც მომღერალმა დააანონსა. ახალი სინგლის, The Dead Dance-ის გამოსვლის თარიღი უკვე ცნობილია. ლედი გაგა 28 აგვისტოს ნიუ-იორკში Netflix-ის და Spotify-ს ღონისძიებას, Graveyard Gala-ს დაესწრო, რომელიც პოპულარული სერიალის, Wednesday-ის მეორე სეზონის პრე-კამპანიის ნაწილი იყო. სცენაზე მასთან ერთად ჯენა ორტეგა, ემა მაიერსი და ჯოი სანდეი წარდგნენ. სწორედ იქ გამოაცხადა გაგამ, რომ მისი სინგლი, რომელზეც სოციალურ ქსელში დიდი ხანია, საუბრობენ, Wednesday-ს მეორე სეზონის მეორე ნაწილის პრემიერასთან ერთად 3 სექტემბერს გამოვა.
„ეს შოუს ნაწილია,” – მიმართა გაგამ ფანებით სავსე დარბაზს და შეატყობინა, რომ ღონისძიებაზე დამსწრე ადამიანები კუბოების თემატიკის სპეციალურ კაბინებში შეძლებდნენ სიმღერის ექსკლუზიურად მოსმენას. „იმედი მაქვს, თქვენს კუბოებში თავს საკმაოდ კომფორტულად იგრძნობთ,“ – დაამატა მან.
ღონისძიებაზე გაგამ ასევე ისაუბრა სერიალში გადაღების გამოცდილებაზე და მადლობა გადაუხადა მსახიობებსა და გადამღებ ჯგუფს იმისთვის, რომ მისი „პატარა როლი“ განსაკუთრებულად აქციეს. „შესანიშნავი დრო გავატარე Wednesday-ს მეორე სეზონის გადაღებებზე,“ – თქვა მან. „ტიმ ბარტონთან, ჯენასთან და აქ მყოფ ყველა საოცარ ადამიანთან ერთად მუშაობა ძალიან მომეწონა.“
უკვე გამოქვეყნდა Wednesday-ს მეორე სეზონის მეორე ნაწილის ახალი ტრეილერიც, რომელიც, როგორც ჩანს, გაგას გამოჩენაზე მიანიშნებს. მიუხედავად იმისა, რომ გაგა ეკრანზე არ ჩნდება, ორწუთიანი თიზერის ბოლოს ისმის ხმა, რომელიც ძლიერ ჰგავს გაგას ხმას და ორტეგას პერსონაჟს ეუბნება: „ფრთხილად, ყველაფერს თავისი ფასი აქვს.“
Wednesday-სთვის დაწერილი სიმღერის გამოქვეყნების პარალელურად, გაგას მასშტაბური ტურნე – Mayhem Ball ნიუ-იორკში გრძელდება. ბოლო კვირას მან Madison Square Garden-ში ოთხი კონცერტი ჩაატარა ანშლაგით და 6 და 7 სექტემბერს ფინალური ორი შოუსთვის ისევ დაუბრუნდება ცნობილ სცენას.
