31 აგვისტოს ტეილორ სვიფტის ახალმა ნამუშევარმა Spotify-ს ისტორიაში წინასწარი შენახვების რეკორდი მოხსნა. აქამდე ეს მაჩვენებელი ტეილორ სვიფტის 2024 წლის ალბომს, The Tortured Poets Department-ს ჰქონდა. ინფორმაციას სტრიმინგ-პლატფორმა ოფიციალურ Instagram-სა და X-ზე ავრცელებს.
The Life of a Showgirl-ის გამოსვლამდე დარჩენილი დროის ათვლა სპოტიფაიმ 14 აგვისტოს დაიწყო და იქვე დაურთო 22 კომპოზიციისგან შემდგარი ექსკლუზიური ფლეილისტი, რომელიც ტეილორ სვიფტმა დიდი ხნის პარტნიორებთან, მაქს მარტინთან და Shellback-თან ერთად შექმნა.
Spotify-ზე ტეილორ სვიფტის ლიდერ პოზიციაზე ყოფნა კიდევ ერთხელ ადასტურებს, რომ წლების განმავლობაში მუსიკოსმა მრავალი რეკორდი მოხსნა, მათ შორის 2024 წელს გახდა პლატფორმის ყველაზე ხშირად მოსმენადი შემსრულებელი 26.6 მილიარდზე მეტი გლობალური სტრიმით.
ტეილორ სვიფტმა მასშტაბური Eras Tour-ის დასრულებიდან 8 თვის შემდეგ, 12 აგვისტოს, ალბომ The Life of a Showgirl-ის გამოსვლა მოულოდნელად პოდკასტში New Heights დააანონსა. პოდკასტს მისი პარტნიორი ტრევის კელსი და ტრევისის ძმა, ჯეისონ კელსი უძღვებიან. ტეილორ სვიფტმა გადაცემის თიზერ ვიდეოში ალბომის სათაური გაამხილა, რომელიც პოდკასტის სრული ეპიზოდის გამოქვეყნებამდე გავრცელდა.
The Life of a Showgirl სვიფტის მეთორმეტე სტუდიური ალბომია, რომელიც 3 ოქტომბერს გამოვა და 12 კომპოზიციას მოიცავს.
ტეილორ სვიფტის წინა ნამუშევარი The Tortured Poets Department 2024 წლის აპრილში გამოვიდა, მან Billboard 200-ის ჩარტში N1 ადგილი დაიმკვიდრა. ალბომმა ჯამში 17 კვირა გაატარა ჩარტის სათავეში და ტეილორ სვიფტს გრემის დაჯილდოებაზე წლის ალბომის ნომინაცია მეშვიდედ მოუტანა.
ნახეთ Spotify-ს ოფიციალური განცხადება ტეილორ სვიფტის უახლესი რეკორდის შესახებ.
