WSJ Magazine-ის 2025 წლის Innovator Awards-ზე ბილი აილიში სიტყვით გამოვიდა და მსოფლიოს მილიარდერები – მათ შორის ოთახში მყოფი რამდენიმე მათგანი პირდაპირ გააკრიტიკა.
ნიუ-იორკში ჩატარებულ ღონისძიებაზე პოპვარსკვლავი ჟურნალის მუსიკალურ ინოვატორად დასახელდა. აილიში სცენაზე სტივენ კოლბერტმა მიიხმო და ასევე გამოაცხადა, რომ საღამოს ღირსეულმა სტუმარმა საკუთარი ტურნეს, Hit Me Hard and Soft Tour-ის ფარგლებში, კვების დეფიციტისა და კლიმატის ცვლილების წინააღმდეგ მებრძოლი ორგანიზაციისთვის 11.5 მილიონი დოლარი გაიღო.
როდესაც აილიში სცენაზე ავიდა, დარბაზში მსოფლიოს ყველაზე მდიდარი და გავლენიანი სტუმრები ისხდნენ, მათ შორის იყო მარკ ცუკერბერგიც, რომელიც, Forbes-ის შეფასებით, 228 მილიარდი დოლარის ქონებას ფლობს და ეს მას პლანეტის მეხუთე ყველაზე მდიდარ ადამიანად აქცევს. Meta-ს ხელმძღვანელი ღონისძიებას დაესწრო მეუღლის, პრისილა ჩენის მხარდასაჭერად, რომელსაც იმ საღამოს CZI-ში საქველმოქმედო საქმიანობისთვის აჯილდოებდნენ.
„ადამიანებს ჩვენს ქვეყანაში თანაგრძნობა და დახმარება სჭირდებათ“, — თქვა აილიშმა, შემდეგ კი პირდაპირ მიმართა დარბაზში მსხდომ ბიზნესმენებს:
„თუ გაქვთ ფული, ძალიან კარგი იქნებოდა, კარგ საქმეებში რომ გამოიყენოთ და მისცეთ მათ, ვისაც სჭირდება. აქ რამდენიმე ადამიანს ბევრად მეტი ფული აქვს, ვიდრე მე. თუ მილიარდერი ხარ — რატომ ხარ მილიარდერი? არაფერს გერჩით, მაგრამ გაიღეთ თქვენი ფული!”
Billboard-მა კომენტარისთვის Meta-ს მიმართა.
ღონისძიება იმავე დღეს გაიმართა, როდესაც WSJ Magazine-მა ბილი აილიშის ინტერვიუ გამოაქვეყნა, სადაც მან ტურზე და ალბომის შექმნის პროცესზე ისაუბრა. აილიშმა გაამხილა, რომ Birds of a Feather-ის გამოშვება ლამის გადაიფიქრა, რადგან ეშინოდა, რომ ის „სულელური“ იქნებოდა.
აილიშის მიერ გაღებული 11.5 მილიონი დოლარი მის ე.წ. Changemaker Program-ს მოხმარდება, რომელიც მთელ მსოფლიოში შიმშილისა და გარემოსდაცვით პრობლემებზე მომუშავე ორგანიზაციებს ეხმარება. ტურნედან თანხების მოძიებასთან ერთად, მომღერალი საკუთარ კონცერტებზე მცენარეულ საკვებს სთავაზობს აუდიტორიას, ასევე იყენებს ბიოდეგრადირებად მასალას და მაყურებელს მოუწოდებს, წყლის მრავალჯერადი ბოთლებით ისარგებლოს და კონცერტებზე საზოგადოებრივი ტრანსპორტით მივიდეს.
აილიშს არაერთხელ გაუსვამს ხაზი მუსიკალურ ინდუსტრიაში არსებული ფუჭი მოხმარების პრობლემაზე.
