სტრიმინგ სერვის Spotify-ზე ქართული ბენდის, MokuMoku-ს ყოველთვიური მსმენელების რიცხვმა 100 000-ს მიაღწია. ეს რაოდენობა ქართულ ბენდებსა და სოლო არტისტებს შორის ერთ-ერთი უმაღლესი მაჩვენებელია.
MokuMoku ალტერნატიული ჰიპ-ჰოპ ბენდია, რომელიც 2014 წელს ჩამოყალიბდა. ჟანრობრივი მიმართულება აერთიანებს ჰიპ-ჰოპის, როკისა და ფანკის ელემენტებს. ბენდი ენერგიული ცოცხალი შესრულებებით გამოირჩევა. ჯგუფს დღემდე გამოშვებული აქვს ხუთი ალბომი: Blues Build The Temple (2015), Black Heaven (2017), Chicago Marinade (2019), SoulFood Society (2020) და Off The Record (2023).
ბენდის შემადგენლობაში არიან: ტატო რუსია (ვოკალი), ჯონდო ჯაფარიძე (ვოკალი, ფირსაკრავი), ცოტნე გოგიტიძე (გიტარა), სანდრო მაისურაძე (ბასი), ალექსანდრე ხოხიაშვილი (დრამი), ლუკა თოფურია (კლავიში), თორნიკე აბულაძე (საქსოფონი), ნასი ჭავჭავაძე (პერკუსია).
რაც შეეხება Spotify-ს ყოველთვიურ მსმენელებს, ეს მაჩვენებელი ასახავს, რამდენმა უნიკალურმა მომხმარებელმა მოუსმინა არტისტის ტრეკებს ბოლო 28-30 დღეში. მონაცემები ყოველდღიურად ახლდება და იცვლება იმის მიხედვით, რამდენ ახალ მსმენელს მოიზიდავს არტისტი თვის განმავლობაში ან რამდენი მომხმარებელი შეწყვეტს მოსმენას.
ეს მეტრიკა აჩვენებს არა მხოლოდ სტრიმების რაოდენობას, არამედ მუსიკის წამყვან პლატფორმაზე არტისტის რეალურ აუდიტორიას, აქტუალობას და ზრდის დინამიკას. ყოველთვიური მსმენელების მაღალი რაოდენობა ნიშნავს, რომ მუსიკა სხვადასხვა სარეკომენდაციო და კურატორულ სიებში, ასევე ოფიციალურ და მომხმარებლების მიერ შექმნილ ე.წ. ფლეილისტებშია დამატებული.
