მოუსმინეთ: Future ალბომს I NEVER LIKED YOU ავრცელებს

2 მაისი, 2022

ფოტო: Meredith Jenks/Billboard

ატლანტელმა ჰიპ ჰოპ არტისტმა Future რიგით მეცხრე სტუდიური ალბომი I NEVER LIKED YOU გამოუშვა. 16-ტრეკიან ჩანაწერში მოწვეული არტისტების რანგში გვხვდებიან: ქანიე ვესთი, განა, იანგ თაგი, დრეიქი, თემსი, ისთ გი და კოდაკ ბლექი. კანადელი შემსრულებელი, დრეიქი ნამუშევრის ორ კომპოზიციაში Wait For U და I’m on One მონაწილეობს.

ახალ სტუდიურ ალბომზე რეპერი ჟურნალ GQ-ს ესაუბრა:

“მასში ჩემს თავს ვდებ. სამყაროს ვუზიარებ ჩემი ცხოვრების სტილს, ტკივილს, აღმასვლებსა და დაღმასვლებს. მე მჯერა სამყაროს ენერგიის. ამიტომაც, შელამაზების გარეშე წარმოვაჩენ საკუთარ თავს, რადგან მსურს, ის გამოსწორდეს. არ მინდა, რომ შეცდომები დავუშვა. მზად ვარ, ჩემი თავი სრულად გაგიზიაროთ, თქვენ კი მეტყვით, როგორ გავხადო ის უკეთესი”, – აღნიშნა მუსიკოსმა ინტერვიუში.

რეპერმა უკვე მეცხრე ალბომი გამოუშვა. თავისი კარიერის ხანგრძლივობის შესახებ საუბრისას Future-მ თქვა:

“მე აქ ვაპირებ დარჩენას, ეს უკვე დავამტკიცე. წელიწადში 100 ჰიტი მქონდა, ხოლო ისინი კვლავ მეკითხებიან, ჰეი, რა გეგმები გაქვს? მე კი ისევ უნდა დავამტკიცო, რომ ამის კეთება შემიძლია. ვაჩვენე, რომ შემიძლია, ორ კვირაში გავრცელებული ორივე ალბომი ჩარტის სათავეში მოხვდეს. მე აქ იმიტომ მოვედი, რომ დავრჩენილიყავი”.

ატლანტელმა ნეივადიუს უილბერნმა, ფსევდონიმით Future, შემოქმედებითი მოღვაწეობა 2009 წელს დაიწყო. ის თრეფ მუსიკაში ვოკალური ეფექტებისა და მელოდიების გამოყენების პიონერად მიიჩნევა. გრემის მფლობელ შემსრულებელს დღემდე ცხრა სტუდიური ალბომი აქვს გამოშვებული, მათ შორის ექვსი Billboard 200-ის ჩარტის სათავეში მოხვდა. მას აგრეთვე არაერთი წარმატებული კოლაბორაციული ჩანაწერი აქვს გამოცემული. მუსიკოსი თანამედროვე ჰიპ ჰოპის ერთ-ერთი ყველაზე მოთხოვნადი წარმომადგენელია.