11 მარტს, გამოცემა The Insneider-მა გაავრცელა ინფორმაცია, რომ აილიში სილვია პლათის რომანის – The Bell Jar-ის ეკრანიზაციაში მთავარ როლზე განიხილება და ამჟამად მოლაპარაკებებს აწარმოებს. ფილმის რეჟისორი ოსკარის მფლობელი სარა პოლი იქნება. მოგვიანებით ეს ინფორმაცია გამოცემა Deadline-მაც დაადასტურა.
პროექტზე რეჟისორი Joy Gorman Wettels-თან, Plan B Entertainment-სა და StudioCanal-თან პარტნიორობით იმუშავებს. აშშ-ში ფილმის დისტრიბუტორი Focus Features იქნება.
რომანი ნახევრად ავტობიოგრაფიული ისტორიაა ახალგაზრდა ქალზე, რომელიც 1950-იანი წლების ნიუ-იორკში, ჟურნალში სტაჟირებისას, ფსიქიკურ აშლილობას ებრძვის. წიგნის გამოცემიდან ერთი თვის შემდეგ პლათმა სიცოცხლე თვითმკვლელობით დაასრულა.
სარა პოლმა 2023 წელს ოსკარი საუკეთესო ადაპტირებული სცენარისთვის მიიღო და ამ ეკრანიზაციისათვისაც ის თავად მოამზადებს სცენარს. აილიში მთავარი გმირის, ესთერ გრინვუდის როლზე განიხილება.
მიუხედავად იმისა, რომ ეს აილიშის პირველი კინოროლია, მას სამსახიობო გამოცდილება უკვე აქვს. 2023 წელს მომღერალმა მონაწილეობა მიიღო დონალდ გლოვერისა და ჯანინ ნეიბერსის სერიალში – Swarm.
2023 წლის ინტერვიუში Variety-სთან, მომღერალმა აღნიშნა, რომ მსახიობობა მისი ბავშვობის ოცნება იყო, თუმცა მუსიკალურ კარიერაში წარმატების ფონზე, ამ ოცნებაზე უარი თქვა, რადგან შიშობდა, რომ შესაძლოა არასაკმარისად ნიჭიერი ყოფილიყო.
„ეს ყოველთვის იყო ჩემი ოცნება, რომელზეც საუბარს ვერიდებოდი, რადგან მეგონა, რომ ძალიან ცუდი მსახიობი ვიყავი,” – თქვა აილიშმა ინტერვიუში.
