პოლ მაკარტნისა და ფელა კუტის შორის მეგობრობა ადრეულ 1970-იან წლებში დაიწყო და გარკვეულწილად ეს მარიხუანას მოწევასაც უკავშირდება. თუმცა მანამდე მათ უკვე მოგვარებული ჰქონდათ გაუგებრობა, რომელიც პოლ მაკარტნის ბენდის, Wings-ის ნიგერიაში ვიზიტის დროს მუსიკოსებს შორის წარმოიშვა.
Audible-ის Words + Music-ის ახლადდაანონსებული Man on the Run ეპიზოდიდან გამოქვეყნებულ ვიდეოში The Beatles-ის წევრი იხსენებს, თუ როგორ განმუხტა დაძაბული სიტუაცია აფრობიტსის ინოვატორთან. მისი თქმით, კუტის ჰქონდა ინფორმაცია, რომ 1973 წლის ალბომზე Band on the Run მუშაობისას მაკარტნი და მისი ჯგუფის წევრები აფრიკული მუსიკის მისაკუთრებას ცდილობდნენ.
„პირველი, რაც ვნახე, იყო გაზეთის სათაური: ფელა კუტი პოლ მაკარტნის შავკანიანთა მუსიკის მოპარვაში ადანაშაულებს,” – ეუბნება მუსიკოსი ინტერვიუერ მორგან ნევილს. „მე კი ავიღე ტელეფონი, დავურეკე და ვუთხარი, რომ ამას სრულებითაც არ ვაკეთებდი. ‘მოდი სტუდიაში და დაგიმტკიცებ’, – ვუთხარი მას.”
მაკარტნი იხსენებს, თუ როგორ მივიდა კუტი – რომელიც 1997 წელს 58 წლის ასაკში გარდაიცვალა – Wings-ის სტუდიაში თავისი დიდი გარემოცვითა და მრავალი ცოლით.
„დავიწყე იმ მუსიკის დაკვრა, რომელზეც იმ დროს ვმუშაობდით და მას არაფერი ჰქონდა საერთო იმასთან, რასაც ის ამბობდა. მისი დარწმუნება მოვახერხე და ჩვენ ძალიან კარგი მეგობრები გავხდით.”
მეგობრობის დაწყებას მალევე მოჰყვა ორი მუსიკალური ლეგენდის დასამახსოვრებელი შეხვედრა: „საერთოდ არ ვაპირებდი მარიხუანის მოწევას, ამ დროს კი მან ჯინჯერ ბეიკერს (Cream-ისა Blind Faith-ის დრამერი) მიაწოდა და თან გამოაცხადა: ‘ჯინჯერ ბეიკერი – ერთადერთი კაცი, ვისაც ვიცნობ, რომელიც არასდროს ამბობს უარს მოწევაზე.’ მაშინ ვიფიქრე: ‘ესე იგი, მე ის ადამიანი ვარ, რომელიც უარს ამბობს მოწევაზე’ და ვთქვი: ‘კარგი, იყოს’ და ეს გავაკეთე. სრულიად გავაფრინე, პრაქტიკულად გავითიშე, ნერვიული და პარანოიდული გავხდი,” – იხსენებს მუსიკოსი. ერთადერთი, რამაც, მისი თქმით, მაკარტნის დამშვიდება შეძლო, ეს კუტისა და მისი ბენდის მუსიკა იყო, რომელმაც იმ ღამეს ლეგენდარული მუსიკოსი ცრემლებამდეც კი მიიყვანა.
სამსაათიანი ინტერვიუ, რომელიც მაკარტნის ცხოვრებასა და კარიერას ეხება, Audible-ზეა ხელმისაწვდომი. ეპიზოდი ერთგვარი გაგრძელებაა Prime Video-ს დოკუმენტური ფილმის Man on the Run, რომლის პრემიერაც თებერვალში შედგა.
„წარსულზე ფიქრში ბევრ დროს არ ვხარჯავ, მაგრამ გამიხარდა, როცა მორგანმა მითხრა, რომ ამ პერიოდით იყო დაინტერესებული,” – თქვა მაკარტნიმ განცხადებაში Band on the Run-ის პერიოდზე. „Wings-ის საწყისი ეტაპი საკმაოდ რთული იყო და წარუმატებელიც, მაგრამ საბოლოოდ მაინც შევძელით ისეთი სიმღერების შექმნა, რომლებიც ჰიტებად იქცა.”
„მორგანმა ისეთ რაღაცებზე დამაფიქრა, რომლებზეც დიდი ხანია არ მიფიქრია. ის ძალიან სწორ კითხვებს სვამდა და ბედნიერი ვიყავი დროში დაბრუნებით.”
Words + Music-ის გასული ეპიზოდების სტუმრები იყვნენ: ჯორჯ კლინტონი, ჯონ ლეჯენდი, ჯეიმს ტეილორი, პატი სმითი, Snoop Dogg, ალანის მორისეტი, აშერი, სტინგი, მერაია კერი და სხვები.
