კომპოზიტორი თეოდორ შაპირო BMI Icon-ის ჯილდოს მიიღებს 2026 წლის კინოს, ტელევიზიისა და ვიზუალური მედიის დაჯილდოების ცერემონიაზე, რომელიც 13 მაისს ბევერლი ჰილსში, კალიფორნიაში გაიმართება. შაპიროს მოგებული აქვს ორი პრაიმტაიმ ემი სერიალის საუკეთესო მუსიკალური კომპოზიციისთვის. წელს მან ასევე მიიღო გრემის ნომინაცია ვიზუალური მედიისთვის შექმნილი საუკეთესო საუნდტრეკისთვის.
„მოხარულები ვართ, რომ ტედის BMI Icon-ის ჯილდოს გადავცემთ,” – აღნიშნა BMI-ს ვიცე-პრეზიდენტმა ტრეისი მაკნაიტმა. „მან ორ დეკადაზე მეტი გაატარა ყველა იმ სიუჟეტის გამდიდრებაში, რასაც კი შეეხო. მისი საუნდტრეკები კი ჩვენი დროის ერთ-ერთი ყველაზე საყვარელი და გამორჩეული ფილმებისა და სატელევიზიო სერიალების სინონიმებად იქცა.”
შექმნილი საუნდტრეკებისთვის შაპიროს ჯამში BMI-ს 25 ჯილდო აქვს მოგებული. მისი საკომპოზიტორო კარიერა მოიცავს როგორც კომედიას („ეშმაკს აცვია პრადა” და 13 Going on 30), ასევე დრამას (Bombshell და The Eyes of Tammy Faye). პირველი პრაიმტაიმ ემის ნომინაცია მან 2012 წელს მიიღო.
შაპირომ შექმნა საუნდტრეკი 2025 წლის თრილერისთვის The Housemaid და მუსიკალურად გააფორმა „ეშმაკს აცვია პრადა 2”, რომელიც კინოთეატრებში პირველ მაისს გამოვა. მის ნამუშევრებს შორისაა ასევე Focker in Law და მინისერიალი The Off Weeks.
მანამდე BMI Icon-ის ჯილდო მიღებული აქვთ ტერენს ბლანჩარდს, მაიკლ დანას, ალექსანდრ დეპლას, მაიკ პოსტს, ატიკუს როსს, ჯონ უილიამსს და სხვა კომპოზიტორებს.
13 მაისის ცერემონია ასევე პატივს მიაგებს გასული წლის მაღალბიუჯეტიანი ფილმების, მაღალრეიტინგიანი სატელევიზიო სერიალებისა და წარმატებული მედიაპროგრამების კომპოზიტორებს. ღონისძიებას ტრეისი მაკნაიტთან ერთად BMI-ის აღმასრულებელი დირექტორი მაიკ ო’ნილი და BMI-ის აღმასრულებელი ვიცე-პრეზიდენტი მაიკ სტენბერგი გაუძღვებიან.
