მუსიკალურ სცენაზე აქტიურად გამოჩენიდან 60 წელზე მეტი ხნის შემდეგაც კი, The Rolling Stones კვლავ ენერგიულია. ამჯერად ლეგენდარული ბენდი ახალ პროექტს – Foreign Tongues-ს აანონსებს. მინიშნებები ჯგუფის ოფიციალურ სოციალურ გვერდებზე უკვე გამოჩნდა. პოსტებში ასახულია მსოფლიოს სხვადასხვა ქალაქში გაკრული პოსტერები, რომლებზეც გამოსახულია ჯგუფის ცნობილი ლოგო და მრავალ ენაზე დაწერილი ფრაზა – Familiar Tongues. პოსტერებზე დატანილ QR კოდს მომხმარებელი გადაჰყავს სპეციალურ ვებ-გვერდზე, სადაც იყიდება სუნამოები, რომლის ხაზის საერთო სახელწოდებაა Subversive Scents (ამბოხებული სურნელები). პროდუქტებს ჯგუფის ისეთი ცნობილი ჩანაწერების სახელები ჰქვია, როგორიცაა: Sticky Fingers და Urban Jungle.
ეს კამპანია მოჰყვა პოსტერების წინა სერიას, რომელიც ჯგუფის ალტერ-ეგოს, The Cockroaches-ს ეხებოდა. მოგვიანებით ვინილზე შეზღუდული ტირაჟით გამოიცა ჩანაწერი, სახელწოდებით Rough & Twisted.
The Rolling Stones-მა ბოლო ალბომი – Hackney Diamonds 2023 წელს გამოუშვა. ჯგუფის 24-ე სტუდიურ ჩანაწერში მონაწილეობდნენ პოლ მაკარტნი, ელტონ ჯონი, ლედი გაგა, სტივი უანდერი და ასევე შესული იყო გარდაცვლილი დრამერის, ჩარლი უოტსის ბოლო ჩანაწერები. ალბომმა გრემის ჯილდოც მოიპოვა საუკეთესო როკ-ალბომის ნომინაციაში.
გასულ დეკემბერში გავრცელდა ინფორმაცია, რომ Stones-მა გააუქმა 2026 წლის ტურნე გაერთიანებულ სამეფოსა და ევროპაში, რომლის თარიღები ოფიციალურად ჯერ არც კი იყო გამოცხადებული. გამოცემა Variety-ს ინფორმაციით, ჯგუფმა ტურნეს გეგმებზე უარი თქვა, რადგან 82 წლის კიტ რიჩარდს არ შეეძლო ზუსტად ეთქვა, შეძლებდა თუ არა კიდევ ერთ დამღლელ ტურნეს.
Hackney Diamonds-ის პროდიუსერმა, ენდრიუ ვატმა გასულ სექტემბერში ჟურნალ Rolling Stone-ს განუცხადა, რომ ის უკვე მუშაობს ჯგუფის მომდევნო ალბომზე. მან ეს პროცესი ბეტმენთან მუშაობას შეადარა: „როცა ჰაერში ჯგუფის ენის ლოგო ჩნდება, მაშინვე მოქმედებაზე გადადიხარ. შემიძლია ვთქვა, რომ გარკვეული ჩანაწერები უკვე გავაკეთეთ, მაგრამ მეტს ვერაფერს გეტყვით“.
იმავე თვეში კი რონი ვუდმაც დაადასტურა, რომ ფანები 2026 წელს ახალ ალბომს მიიღებენ.
