ცნობილი ჰიპ ჰოპ არტისტი ASAP Rocky პოდკასტის Drink Champs ახალი ეპიზოდის სტუმარი გახლდათ. წამყვანთან N.O.R.E. ინტერვიუში მან მოდაზე, თავის ვისკის ბრენდსა და სხვა თემებზე ისაუბრა. ისინი ფესტივალ “ასტროვორლდის” ტრაგედიასაც შეეხნენ, რამაც შარშან ადამიანების სიცოცხლე იმსხვერპლა.
2021 წლის ნოემბერში რეპერ ტრევის სკოტის ფესტივალზე მომხდარი ჭყლეტის შედეგად 10 ადამიანი დაიღუპა, რამდენიმე ათასი კი დაშავდა. მუსიკოსისა და საპრომოუტერო კომპანია Live Nation-ის წინააღმდეგ სასამართლოში ათასობით სარჩელია შეტანილი.
“დღეს უკვე ყველა იჩენს სიფრთხილეს მას შემდეგ, რაც მოხდა. ვფიქრობ, აქამდე არც კომპანია Live Nation-ს ან ვინმე სხვას უნახავს ამდენი აბსურდული სარჩელი. ეს ყველასთვის სიახლეა. ამის მიუხედავად, ჩემს კონცერტებზე მაინც სიგიჟე ხდება. ეს ჩვენი კულტურის ნაწილია. ჩვენ კი ვრეპავთ, მაგრამ გვაქვს პანკის მენტალობა. მიდიხარ შოუზე და გინდა, გამოუშვა ბრაზი და ენერგია”, – განაცხადა როქიმ.
N.O.R.E. ინტერვიუში მომღერალ რიანასაც შეეხო, რომელიც როქისგან ბავშვს ელოდება. “ახლა შენ და რირი ჰარლემში, შენს უბანში ხართ, არა?”.
ეისეფ როქიმ შემოქმედებითი მოღვაწეობა 2007 წელს დაიწყო. მუსიკოსის დისკოგრაფია კომერციულად წარმატებულ ალბომებს Long.Live.A$AP და At.Long.Last.A$AP მოიცავს, რომლებიც Billboard 200-ის ჩარტის სათავეში მოხვდნენ. 2018 წელს შემსრულებელმა დღეისათვის ბოლო, რიგით მესამე სტუდიური ჩანაწერი Testing გამოუშვა, რომელიც ოქროს სტატუსის მფლობელია. სოლო კარიერის გარდა, რეპერი გაერთიანება ASAP Mob-ის ერთ-ერთი ლიდერია.
