30 ივლისს რუსთავის საერთაშორისო ავტოდრომზე Moby-ს კონცერტი გაიმართა. ლაივი Flitz Collective-ის ორგანიზებით ჩატარდა. ეს პირველი შემთხვევა იყო, როცა მობი ქართველი აუდიტორიის წინაშე წარდგა. არტისტი საქართველოს მსოფლიო ტურნეს ფარგლებში ეწვია, რომელიც ევროპისა და ამერიკის შეერთებული შტატების სხვადასხვა ქალაქში კონცერტებს მოიცავს.
Moby-მ ლაივი გახსნა ტრეკით – Bodyrock, რომელიც 1999 წლის საკულტო ალბომის, Play-ს ერთ-ერთი ცნობილი სინგლია. ლაივზე ასევე შესრულდა ისეთი ჰიტები, როგორებიცაა: In My Heart, Why Does My Heart Feel So Bad?, Honey, Natural Blues, Flower, Porcelain. კონცერტი დასრულდა Moby-ს 1994 წლის ერთ-ერთი ყველაზე ენერგიული და საკულტო ტრეკით – Feeling So Real, რომელიც შესულია არტისტის მესამე სტუდიურ ალბომში – Everything Is Wrong.
არტისტმა აუდიტორიას ქართულ ენაზე რამდენჯერმე გადაუხადა მადლობა.
აღსანიშნავია, რომ Moby-ს გამოსვლამდე სცენა ქართველ შემსრულებლებს დაეთმო. გამხსნელი აქტი ჯგუფმა Circus Mircus-მა შეასრულა.
Moby თანამედროვე მუსიკალური სცენის ერთ-ერთი ყველაზე გავლენიანი ფიგურაა, რომლის კარიერა 30 წელზე მეტს ითვლის. ამ დროის განმავლობაში არტისტმა მსოფლიოში 20 მილიონზე მეტი ალბომი გაყიდა და მნიშვნელოვანი გავლენა მოახდინა ელექტრონული, ემბიენტისა და ალტერნატიული მუსიკის განვითარებაზე. მისი დისკოგრაფია მოიცავს არაეთ საკულტო ალბომს, მაგალითად როგორიცაა Play, რომლის ტრეკებიც არაერთ ფილმსა და სერიალში გაჟღერდა.
ფოტო: ნინუცა კაკაბაძე/Billboard Georgia
კულისებში Billboard Georgia არტისტს შეხვდა და მასთან ინტერვიუ ჩაწერა, რომელიც მალე გამოცემის ვებგვერდსა და სოციალური ქსელების არხებზე განთავსდება.
