ჰარი სტაილსმა 29 აგვისტოს, მედისონ სკვერ გარდენის შოუების სერიის მესამე საღამოს, ყოფილი შეყვარებულის, ტეილორ სვიფტის ქორწილზე იხუმრა.
კონცერტის დასასრულს მან დარბაზის ბოლო პერიოდის მნიშვნელოვან მოვლენებზე გაამახვილა ყურადღება და შემდეგ ხუმრობით დაამატა:
„ჩვენ მედისონ სკვერ გარდენში ვართ, NBA-ის მოქმედი ჩემპიონის, ნიუ-იორკ ნიქსის სახლში!“ – მიმართა მან მაყურებელს, შემდეგ კი დაამატა: „აქ ქორწილებსაც იხდიან.“
მისმა სიტყვებმა, რომელიც ტეილორ სვიფტისა და ტრევის კელსის 3 ივლისს, ამავე დარბაზში გამართულ ქორწილს ეხებოდა, მაყურებლის დიდი ოვაციები გამოიწვია.
ცნობისთვის სტაილსი და სვიფტი 2012 წლის ნოემბრიდან 2013 წლის იანვრამდე ხვდებოდნენ ერთმანეთს. გავრცელებული მოსაზრებით, სწორედ ამ ურთიერთობამ შთააგონა ტეილორ სვიფტს 2014 წლის ჰიტის, Style-ის შექმნა. როგორც ცნობილია, სტაილსმა სვიფტისა და კელსის ქორწილში მიწვევა მიიღო, თუმცა ცერემონიას არ დასწრებია. იმ პერიოდში გამოცემა Variety-ს წყარომ განუცხადა, რომ სტაილსი „ამჟამად ტურნეში იმყოფებოდა და MSG-ზე ჩასვლას ვერ შეძლებდა“.
საქორწილო ცერემონიას სტაილსის საცოლე ზოი კრავიცი მის გარეშე დაესწრო. იმავე საღამოს მომღერალი Together, Together-ის ტურნეს ფარგლებში ლონდონში კონცერტს მართავდა. 3 ივლისს უემბლიზე გამართული შოუდან გულშემატკივართა მიერ გავრცელებულ ვიდეოებში ჩანს, როგორ ასრულებს ჰარი სტაილსი 2017 წლის სიმღერას Two Ghosts, რომელიც დიდი ხანია, ტეილორ სვიფტის სიმღერის, Style-ის პასუხად მიიჩნევა. სიმღერაში შემდეგი ტექსტი ჟღერს: Same lips red, same eyes blue / Same white shirt, couple more tattoos…
ჰარი სტაილსის ხუმრობამ რეზიდენციის დაწყებიდან მესამე დღეს დიდი ყურადღება მიიპყრო. მისი 30-კონცერტიანი სერია მედისონ სკვერ გარდენში 2026 წლის აშშ-ის ტურნეს სრულად მოიცავს და ჰელოუინის დღესასწაულამდე გაგრძელდება.
რეზიდენციის პირველი კონცერტი 26 აგვისტოს გაიხსნა. ხოლო იანვარში ბილეთების წინასწარ გაყიდვაზე 11,5 მილიონი რეგისტრაცია დაფიქსირდა. Ticketmaster-ის განცხადებით, ეს ბილეთების წინასწარი გაყიდვის ისტორიაში ყველაზე მაღალი მაჩვენებელია.
ეს ჰარი სტაილსის პირველი საკონცერტო სერიაა 2023 წლის შემდეგ, რომელიც მარტში გამოცემული ახალი ალბომის, Kiss All the Time. Disco, Occasionally-ს მხარდასაჭერად იმართება.
რეზიდენციის გახსნის საღამო განსაკუთრებით შთამბეჭდავი აღმოჩნდა. სტაილსმა ჩვეული სეტლისტი სრულად შეცვალა, რომელიც მანამდე ჩატარებულ 33 კონცერტზე თითქმის უცვლელი იყო. კონცერტის დასასრულს კი მან დოლი პარტონის ხსოვნას პატივი მიაგო.
„უბრალოდ, მინდა, გულწრფელი მადლობა გადავუხადო ყველა იმ მუსიკოსს, ვისგანაც წლების განმავლობაში შთაგონებას ვიღებდი. დოლი, ჩვენ გვიყვარხარ. დიდი მადლობა“, – თქვა მომღერალმა.
ამის შემდეგ დარბაზში დოლი პარტონის 1974 წლის ჩანაწერი I Will Always Love You გაჟღერდა, რომელსაც აუდიტორიაც აჰყვა. კონცერტს ზოი კრავიცი, გეილ კინგი და დრიუ ბერიმორიც ესწრებოდნენ.
სტაილსმა შოუ Sign of the Times-ით და საკონცერტო პროგრამის დასასრულისთვის შერჩეული სიმღერით, Aperture-ით დახურა.
