ნორს უესტი ჩიკაგოში თავისი პირველი სოლო შოუთი სცენაზე გამოვიდა. 13 წლის ნორს უესტმა თავისი სინგლები 5 სექტემბერს The Vic Theatre-ის სცენაზე შეასრულა. მაყურებლებს შორის მისი მშობლები, კიმ კარდაშიანი და კანიე უესტიც იყვნენ, რომლებიც შვილის გამოსვლას დარბაზის საპირისპირო მხარეებიდან ადევნებდნენ თვალს.
ჩიკაგოს კონცერტზე გადაღებულ კადრებში ჩანს, რომ კარდაშიანი და YE ცალ-ცალკე მივიდნენ. კარდაშიანი VIP სექციაში იჯდა. „ძალიან ვამაყობ” – ასე დაასათაურა კანიე უესტმა ნორსის გამოსვლის ვიდეო, რომელიც რეპერმა ინსტაგრამის Story-ში ატვირთა.
ნორსმაც გააზიარა კონცერტის რამდენიმე ვიდეოკლიპი და მსმენელებს მხარდაჭერისთვის მადლობა გადაუხადა.
„ჩემი პირველი სოლო შოუ! ძალიან მიყვარხართ, ეს ჩემთვის მართლაც მთელი სამყაროს ტოლფასია. ეს არის ის, რისთვისაც ვარ გაჩენილი,” – დაწერა ნორსმა.
კონცერტამდე დაახლოებით ერთი თვით ადრე, ნორს უესტის და რეპერ მოლი სანტანას ერთობლივი სადებიუტო ტურნე გაუქმდა. 14-დღიანი ჩრდილოეთ ამერიკული ტური Molly x North Kimokawaii 5 აგვისტოს უნდა დაწყებულიყო.
ნორს უესტის პირველი სოლო შოუ მის სადებიუტო EP-ის – N0rth4evr-ს ეძღვნებოდა, რომელიც მაისის დასაწყისში გამოვიდა. იქამდე მან ყურადღება მიიპყრო, როცა მონაწილეობა მიიღო YE-სა და Ty Dolla $ign-ის ალბომში – Vultures და ასევე FKA twigs-ის ალბომში – EUSEXUA. ახალგაზრდა რეპერმა და პროდიუსერმა თებერვალში სინგლი – Piercing on My Hand გამოუშვა, აპრილში კი ლოს-ანჯელესში, SoFi Stadium-ზე, YE-ს კონცერტზეც გამოვიდა.
რაც შეეხება YE-ს, ის 3-4 სექტემბერს, Soldier Field-ზე ორი საღამოს განმავლობაში მართავდა კონცერტებს. შოუების დროს მან სცენაზე მრავალი სტუმარი გამოიყვანა და თავისი კარიერის ყველა ეპოქა გაიხსენა – The College Dropout-იდან დაწყებული, 2026 წლის ალბომ Bully-თ დამთავრებული.
