Grimes და ილონ მასკი AI-ინფლუენსერ „კლაუდიას“ გამო ერთმანეთს დაუპირისპირდნენ

„ადამიანი, რომელიც ასე საჯაროდ საუბრობს შობადობის მნიშვნელობაზე, თავად არ უნდა უჭერდეს მხარს მის შემცირებას“, – წერს Grimes.
ილონ მასკი და Grimes ფოტო: Stephen Lovekin/Variety/PMC
ილონ მასკი და Grimes
ფოტო: Stephen Lovekin/Variety/PMC

Grimes და ილონ მასკი იმ ყოფილ პარტნიორთა მრავალრიცხოვან სიაში არიან, რომლებსაც ერთმანეთთან ჯერ კიდევ მოუგვარებელი უთანხმოებები აქვთ. უბრალოდ, ისე მოხდა, რომ ისინი ამ საკითხებს იმ სოციალური მედიის პლატფორმაზე არკვევენ, რომელსაც ერთ-ერთი მათგანი ფლობს. კონფლიქტის მიზეზი კი სადავო ტექნოლოგიაა, რომელშიც მუსიკოსის ყოფილი პარტნიორი ილონ მასკი მილიარდობით დოლარის ინვესტიციას გეგმავს.

18 ნოემბერს X-ზე (პლატფორმა, რომელსაც მასკი 2022 წლიდან ფლობს) გამოქვეყნებული პოსტების სერიაში Grimes-მა და ილონ მასკმა, რომლებსაც სამი საერთო შვილი ჰყავთ, სრულად ხელოვნური ინტელექტის მიერ შექმნილი ახალი „ინფლუენსერის“, კლაუდიას შესახებ იკამათეს. 

მასკმა კლაუდიას ვიდეო გააზიარა და კომენტარი დაურთო: „ზეინტელექტს ადამიანის ემოციებზე ზემოქმედება შეუძლია“, კანადელმა არტისტმა კი მას პირდაპირ უპასუხა: „გამოგონილი ქალებით ასეთი აღტაცება, როგორც ჩანს, რეალობისგან თავის არიდების მცდელობაა“.

„კლაუდია მომწონს, მაგრამ… ის ქალი არ არის. ის უცხოპლანეტელი არსებაა, რომლისთვისაც წინაპრების მეხსიერება ერთდროულად წყევლაცაა და კურთხევაც“, – განაგრძო Grimes-მა. „იმ სახეობის სექსუალიზება, რომელსაც სექსუალური ურთიერთობა არ შეუძლია, ნიცშესეული „უკანასკნელი ადამიანის“ იდეის ყველაზე ნათელი გამოხატულებაა.  ჩვენ იმაზე მეტი შეგვიძლია, ვიდრე „მისი“ სექს-მონად ქცევა“.

მასკმა ამ განცხადებას შემდეგი ფრაზით უპასუხა: „მიიღეთ თეთრი აბი“ და თან დაურთო ვიდეო, რომელშიც კლაუდია „მღერის“ სიმღერას იმის შესახებ, თუ როგორ დაეხმარება ხელოვნური ინტელექტი ადამიანებს, უკეთესად იცხოვრონ. 

თუმცა, როგორც ჩანს, Grimes „თეთრი აბის მიღებას“ უახლოეს მომავალში არ აპირებს. ერთ-ერთმა მომხმარებელმა მის თავდაპირველ კომენტარს უპასუხა, რომ „მამაკაცების უმეტესობას ნიცშე არ წაუკითხავს“. Grimes-მა საპასუხოდ ილონ მასკი მონიშნა და დაწერა:

„ჩვენი ლიდერები ნიცშეს უნდა კითხულობდნენ, ილონს კი ის ნამდვილად წაკითხული აქვს… ის უგვირგვინო მეფეა. სურვილის შემთხვევაში, შეუძლია ეს როლი მოირგოს და გააცნობიეროს პასუხისმგებლობა, რომელიც საზოგადოების წინაშე აკისრია“.

მომღერალმა ასევე აღნიშნა, რომ მის ყოფილ პარტნიორს „მეტი შეუძლია“ და მოუწოდა, არსებულ ვითარებაზე მაღლა დადგეს. შემდეგ კი დასძინა:

„ის უნდა გახდეს ისეთი მეფე, როგორიც ყველას სურს. ისეთი, როგორიც ადრე იყო. გადავწყვიტე, ამაზე ვიწრო წრეში აღარ ვილაპარაკო და ყველაფერი საჯაროდ ვთქვა. თუ ის პასუხისმგებლობას აიღებს და დიდსულოვნებას გამოიჩენს, შეძლებს, დაიბრუნოს „ზეციური მანდატი“, რომელიც ამჟამად დაკარგული აქვს“. 

ამ დისკუსიაში მასკიც ჩაერთო და Grimes-ს უპასუხა: „მეფობა არ მინდა და „ზეციური მანდატი“ კი Starship-ს აქვს“. მასკი SpaceX-ის მრავალჯერადი გამოყენების კოსმოსურ ხომალდს გულისხმობდა.

ამ თემაზე სხვა მომხმარებლების კომენტარებზე პასუხისას Grimes-მა მასკის შესახებ კიდევ ორი განცხადება გააკეთა: „ადამიანი, რომელიც შობადობის მაჩვენებელზე ასე საჯაროდ ზრუნავს, თავად არ უნდა უჭერდეს მხარს მის შემცირებას. ილონს საჯარო პატივისცემა რომ გამოეხატა ქალების მიმართ, მთელი სამყარო შეიძლებოდა შეცვლილიყო“.

მიუხედავად იმისა, რომ ყოფილ პარტნიორებს აშკარად განსხვავებული შეხედულებები აქვთ, ორივე მათგანი ხელოვნური ინტელექტის ერთ-ერთი ყველაზე აქტიური მხარდამჭერია. ცოტა ხნის წინ ცნობილი გახდა, რომ Grimes მონაწილეობას მიიღებს პირველ სრულმეტრაჟიან AI ფილმში, რომელიც კინოთეატრებში გამოვა. მომღერალი გაახმოვანებს პერსონაჟს, რომლის გარეგნობაც და მოძრაობებიც სრულად ხელოვნური ინტელექტის მიერ იქნება გენერირებული. 

Grimes ხელოვნური ინტელექტის ტექნოლოგიის სირთულეებს თავის მომავალ ალბომში, Psy Opera-შიც შეეხება, რომელიც, მისი თქმით, ორ ნაწილად იქნება დაყოფილი.

„ნამდვილად არ მინდოდა, რომ ამ პირველი ნაწილის რომელიმე მონაკვეთი ილონს შეხებოდა. საერთოდ არა, ეს უფრო იმაზეა, თუ როგორ იმოქმედა ჩემზე გვიანი იმპერიის ეპოქამ და როგორ მიიღო ამ გამოცდილებამ ჩემში ტრავმული სახე.“ – განაცხადა მან ოქტომბერში, პოდკასტ Proto Pop-ში.

Share
Tweet
Share
Share
Share

Leave a Reply

წინა სტატია

wayward.atom ფოტო: ნინუცა კაკაბაძე

ქართული ელექტრონული მუსიკა საერთაშორისო სცენაზე – wayward.atom-ის გამოცდილება Sonica Glasgow-ზე და სამომავლო გეგმები

შემდეგი სტატია

LISA ფილმიდან Always Lalisa სიმღერა Leave With Me LLOUD/ YouTube

LISA-მ ფილმიდან Always Lalisa ახალი ემოციური სინგლი Leave With Me  წარადგინა

შეიძლება დაგაინტერესოთ

სტუდია „ფანტასმაგორია“ ანიმაციური ფილმი - „ელენე დარიანი“

„ფანტასმაგორიას“ ანიმაციური ფილმი „ელენე დარიანი“ Arte Laguna Prize-ის მთავარი გამარჯვებულია

ფილმში მე-20 საუკუნის ეპოქის დამახასიათებელი ქართული მუსიკალური ნაწარმოებებია გამოყენებული, რომელიც ანიმაციის ემოციურ და პოეტურ ატმოსფეროს განსაზღვრავს.
მეტი
Cardi B სიტყვით გამოდის 2026 წლის Beautycon University-ზე 2026 წლის 19 სექტემბერი, ლოს-ანჯელესი Leon Bennett/Getty Images for Beautycon/Sundial Media & Technology Group

Cardi B ბოლო პერიოდში ნაკლებად აქტიურობას რეტროგრადულ მერკურის უკავშირებს

რეპერი გულშემატკივრებს ჰპირდება, რომ სოციალურ ქსელებსა და საჯარო სივრცეში უფრო ხშირად გამოჩნდება. მისი თქმით, ბოლო რამდენიმე თვის განმავლობაში თავს უჩვეულოდ გრძნობდა.
მეტი
შონ „დიდი“ კომბსი - 2023 წლის 21 სექტემბერი Jemal Countess/Getty Images

Diddy ნიუ-ჯერსის ციხიდან პენსილვანიის დაწესებულებაში გადაიყვანეს

გავრცელებული ინფორმაციიით, მუსიკალური ინდუსტრიის გავლენიანი ფიგურა ციხეში კონფლიქტებში მონაწილეობდა და მკაცრი პატიმრობის ნაცვლად, „პრივილეგირებული“ პირობებით სარგებლობდა.
მეტი
Red Bull Dance Your Style საქართველოს ეროვნული ფინალის გამარჯვებული NEI NEI ფოტო: რეზი ყენია

Red Bull Dance Your Style-ის მსოფლიო ფინალზე საქართველოს NEI NEI წარადგენს

„ყველაზე მნიშვნელოვანი ავთენტურობაა - დარჩე საკუთარი თავის ერთგული“ - NEI NEI იმ გამოცდილებაზე საუბრობს, რომელმაც ის Red Bull Dance Your Style-ის მსოფლიო ფინალამდე მიიყვანა.
მეტი
ტეილორ სვიფტი და ტრევის კელსი 2026 წლის iHeartRadio-ს მუსიკალურ დაჯილდოებაზე. 2026 წლის 26 მარტი, ლოს-ანჯელესი. Christopher Polk/Billboard

„ახლა დაქორწინებული კაცი ვარ” – ტრევის კელსიმ ტეილორ სვიფტთან ქორწინების შესახებ პირველად ისაუბრა

Kansas City Chiefs-ის მოთამაშემ, ტრევის კელსიმ, ქორწინების შემდეგ ჩაწერილი პირველი პოდკასტის, New Heights-ის ეპიზოდის ანონსში ტეილორ სვიფტზე და მათ ქორწინებაზე ისაუბრა.
მეტი
დოლი პარტონი და მაილი საირუსი 61-ე ყოველწლიური გრემის დაჯილდოებაზე, 2019 წლის 10 თებერვალი, ლოს-ანჯელესი, Photo by Kevin Winter/Getty Images for The Recording Academy

მაილი საირუსი ნათლიის, დოლი პარტონის ხსოვნას პატივს მიაგებს: „ახლა გვერდით ანგელოზი მყავს“

„დოლის სურვილი იქნებოდა, რომ ეს ტკივილი მეგრძნო, მასზე სიმღერა დამეწერა, შემდეგ კი გზა განმეგრძო და ძლიერი ვყოფილიყავი“, - დაწერა საირუსმა.
მეტი