გრემის მფლობელი ამერიკელი მუსიკოსები, ბილი აილიში და ფინეასი 28 მარტს ოსკარების რიგით 94-ე დაჯილდოების სცენაზე პერფორმანსით წარდგებიან და მაყურებლებს სიმღერას No Time To Die შესთავაზებენ. ამის შესახებ ინფორმაციას გამოცემა The Hollywood Reporter ავრცელებს. როგორც ცნობილია, კომპოზიცია ჯეიმს ბონდის შესახებ გადაღებული ამავე დასახელების ფილმის საუნდტრეკია.
აღსანიშნავია, რომ და-ძმა სწორედ ზემოხსენებული ნამუშევრით იბრძვის კინოაკადემიის ჯილდოსთვის წლის საუკეთესო საუნდტრეკის ნომინაციაში. 20 და 24 წლის არტისტები ამ კატეგორიაში ფავორიტებად ითვლებიან, რადგანაც მათ უკვე ისეთ ღონისძიებებზე მოიპოვეს გამარჯვება, როგორებიცაა: ოქროს გლობუსი, გრემი, კრიტიკოსების რჩეული და სხვა.
გასული ათწლეულის განმავლობაში ჯეიმს ბონდის შესახებ შექმნილ ფილმებში გამოყენებულმა ორმა კომპოზიციამ მიიღო ოსკარი. ესენია 2012 წლის ფილმიდან Skyfall ამავე სახელწოდების სიმღერა ბრიტანელი ადელის შესრულებით და სემ სმიტის Writing’s on the Wall 2015 წლის კინოსურათიდან Spectre.
ბილი და ფინიასი მაყურებელმა ოსკარების დაჯილდოების სცენაზე ერთხელ უკვე იხილა. მათ 2020 წლის ღონისძიებაზე ლეგენდარული ბრიტანელი მუსიკოსის, ჯონ ლენონის ჰიტი Yesterday შეასრულეს.
