ცნობილმა ამერიკელმა მომღერალმა, სამი გრემის მფლობელმა კელი კლარკსონმა საავტორო გადაცემის The Kelly Clarkson Show მუსიკალურ ნაწილში Kellyoke ფორტეპიანოსა და ვიოლინოს თანხლებით ბილი აილიშისა და ქალიდის 2018 წლის ჰიტი Lovely შეასრულა.
სატელევიზიო შოუს 13 Reasons Why მეორე სეზონის საუნდტრეკმა ბილბორდის ცხელ ასეულში 22 კვირა გაატარა. კომპოზიციაზე გადაღებულმა ვიდეორგოლმა კი იუთუბზე 1,5 მილიარდ ნახვას გადააჭარბა.
კელი კლარკსონმა პოპულარობა 2002 წელს შოუში American Idol გამარჯვებით მოიპოვა. ამავე წელს გამოსული მისი კომპოზიცია A Moment Like This ბილბორდის ცხელი ასეულის სათავეში მოექცა და წლის ყველაზე გაყიდვადი სინგლის სტატუსი დაიმსახურა. გრემის სამი ჯილდოს მფლობელ არტისტს კარიერის განმავლობაში 25 მილიონზე მეტი ალბომი აქვს გაყიდული. მუსიკოსს განსაკუთრებული წარმატება სიმღერებმა: Because Of You, Stronger, Since U Been Gone და Breakaway მოუტანა.
