ცნობილმა ამერიკელმა მომღერალმა, ოლივია როდრიგომ ამერიკის ხმის ჩამწერი აკადემიის რიგით 64-ე დაჯილდოებაზე შვიდი ნომინაციიდან სამში: საუკეთესო ახალბედა არტისტი, წლის საუკეთესო პოპ ვოკალური ალბომი და საუკეთესო პოპ სოლო შესრულება გაიმარჯვა. 19 წლის ოლივია ცერემონიის შემდეგ ჯილდოებით ხელში კამერების წინ პოზირებდა, როდესაც ერთ-ერთი ოქროს გრამოფონი დაუვარდა და გაუტყდა.
აღსანიშნავია, რომ 2010 წელს გრემის ჯილდო როდრიგოს კერპს, ტეილორ სვიფტსაც დაუვარდა, როდესაც საუკეთესო ალბომის კატეგორიაში სტუდიური ნამუშევრით Fearless გაიმარჯვა.
#Grammy winner Olivia Rodrigo poses for photos with her trophies backstage (and drops one of them). https://t.co/rjX2S54hkr pic.twitter.com/UwON0TZa2w
— Variety (@Variety) April 4, 2022
მომღერალმა და მსახიობმა, ოლივია როდრიგომ პოპულარობა Disney-ს სატელევიზიო შოუებში Bizaardvark და High School Musical: The Musical: The Series მონაწილეობით მოიპოვა. რაც შეეხება მუსიკალურ საქმიანობას, მან საყოველთაო აღიარება 2021 წელს გამოშვებული სადებიუტო, ოთხმაგი პლატინის სტატუსის მქონე სინგლით Drivers License დაიმსახურა, რომელიც ბილბორდის ცხელ ასეულში პირველ ადგილზე გავიდა და არტისტს საუკეთესო პოპ სოლო შესრულების კატეგორიაში გრემის ჯილდო მოუტანა. ოლივიას კიდევ ორი გრემი აქვს მიღებული საუკეთესო ახალბედა არტისტისა და წლის პოპ ვოკალური ალბომის კატეგორიებში.
