ქალაქ ნიუ იორკში გამართულ Tribeca Festival-ზე პლატფორმა Netflix-ის მიერ ჯენიფერ ლოპესის შესახებ შექმნილი დოკუმენტური ფილმის დახურული ჩვენება შედგა, რომელიც ასახავდა, თუ როგორ ემზადებოდა ის მომღერალ შაკირასთან ერთად 2020 წლის Super Bowl-ის შოუსთვის. როგორც აღმოჩნდა, ჯეილო უკმაყოფილო და იმედგაცრუებული დარჩა იმ დროით, რაც NFL-მა გამოსვლისთვის გამოუყო.
საბოლოოდ, ჯენიფერმა შაკირას შესთავაზა, გამოყოფილი დრო მათ თანაბრად გაეყოთ.
იმის მიუხედავად, რომ ჯენიფერი მზად იყო, წუთები თანაბრად გაეყო, ის მაინც უკმაყოფილო გახლდათ დროის უკმარისობის გამო.
დოკუმენტური სურათის საჯარო პრემიერა Netflix-ზე 14 ივნისს შედგება. მასში ჩანს, როგორ ცდილობს მომღერალი თავის მუსიკალურ დირექტორთან, კიმ ბურსთან ერთად რამდენიმე ჰიტი ექვს წუთში მოაქციოს.
შოუს სრულმა ქრონომეტრაჟმა 14 წუთი და 5 წამი შეადგინა. აღსანიშნავია, რომ სცენაზე გამოსვლა ჯეილოს 14 წლის შვილმა, ემიმაც შეძლო, რომელმაც ბრიუს სპრინგსტინის Born in the USA იმღერა.
