ბრიტანელ მუსიკოს დუა ლიპას ინსტაგრამზე ფოტოების გამოქვეყნებისთვის წელს უკვე მეორედ პაპარაცი უჩივის. ნიუ იორკელ რობერტ ბარბერას მიერ კალიფორნიის სასამართლოში შეტანილ სარჩელში წერია, რომ მის მიერ 2018 წლის ივლისში გადაღებული კადრები მომღერალმა საავტორო უფლებების დარღვევით სოციალურ ქსელში ატვირთა.
წინა სარჩელის მსგავსად, რომელიც კომპანია Integral Images-ს ეკუთვნის, ბარბერა წერს, რომ დუა ლიპამ ფოტოების გამოქვეყნებით თავისი მუსიკისა და ბრენდის რეკლამირებასა და ბიზნეს ინტერესების განხორციელებას შეუწყო ხელი, მომჩივანს კი ფინანსური ზიანი მიაყენა.
პაპარაცი აგრეთვე აღნიშნავს, რომ თავდაპირველად ის 2019 წლის ივნისში მუსიკოსის წარმომადგენლებს დაუკავშირდა საქმის სასამართლოს გარეთ მოსაგვარებლად, თუმცა, ეს ვერ მოხერხდა, კადრები კი პლატფორმიდან წაიშალა.
დუა ლიპას წარმომადგენლებს სარჩელთან დაკავშირებით ჯერჯერობით საჯარო კომენტარი არ გაუკეთებიათ.
აღსანიშნავია, რომ რობერტ ბარბერას წარსულში არაერთი ცნობილი ადამიანისთვის უჩივლია. 2019 წლის მაისში მან თავისი საავტორო სურათების გამოქვეყნებისთვის მომღერალ არიანა გრანდეს წინააღმდეგ პირველი სარჩელი შეიტანა, 2020 წლის იანვარში კი მეორე. ორივე საქმე მოსამართლემ წარმოებაში არ მიიღო. 2019 წლის ოქტომბერში კი ფოტოგრაფმა სასამართლოს ჯასტინ ბიბერის წინააღმდეგ მიმართა. მოგვიანებით კანადელი პაპარაცთან სასამართლოს გარეთ მორიგდა.
