სამხრეთკორეული ბოიბენდის BTS წევრი, ჯეი-ჰოუპი სოლო ალბომსა და სინგლს აანონსებს. პლატფორმა Weverse-ზე გავრცელებული განცხადების თანახმად, სტუდიური ჩანაწერი Jack in the Box 15 ივლისს ჩაეშვება გაყიდვაში, ორი კვირით ადრე, 1 ივლისს კი სიმღერა გამოიცემა.
• BTS-ის რომელი წევრის სოლო ალბომს ელოდებიან ყველაზე მეტად ფანები
• ნახეთ: BTS სინგლის Yet to Come ანიმაციურ ვიდეორგოლს ავრცელებს
აღნიშნული სიახლე ვიდეოსთან ერთად თავად მუსიკოსმაც გაავრცელა ინსტაგრამზე.
View this post on Instagram
ახლახან კოლექტივის ლეიბლმა Hybe განაცხადა, რომ ჯგუფიდან პირველი სწორედ ჯეი-ჰოუპი გამოუშვებდა სოლო პროექტს. მანამდე კი “ბითიესმა” თაყვანისმცემლებს აცნობა, რომ დროებითი პაუზის აღებას აპირებდა, რათა ბიჭებს ინდივიდუალური ნამუშევრები გამოეცათ.
ამასთან, ცნობილი ხდება, რომ ჯეი-ჰოპი მიმდინარე წლის 31 ივლისს ფესტივალ Lollapalooza-ს მთავარ სცენას დაიკავებს. ეს იქნება პირველი შემთხვევა, როდესაც სამხრეთკორეელი არტისტი ამერიკაში ერთ-ერთი მნიშვნელოვანი მუსიკალური ღონისძიების ჰედლაინერი იქნება. ჯეი-ჰოუპმა დოჟა ქეთი შეცვალა, რომელსაც მაისში ნუშისებრ ჯირკვალზე ოპერაციის გაკეთება მოუწია.
ჯეი-ჰოუპმა პოპულარობა BTS-ის წევრობით მოიპოვა. ჯგუფში მოღვაწეობის გარდა, ის სოლო პროექტებსაც ავრცელებს. 2018 წელს არტისტმა მიქსტეიპი Hope World გამოუშვა, რომელიც Billboard 200-ის ჩარტში 38-ე ადგილზე გავიდა. 2019 წელს კი ამერიკელ მუსიკოს Becky G-სთან ერთად DJ Webstar-ისა და რეპერ Bianca Bonnie-ს 2006 წლის ჰიტის Chicken Noodle Soup განახლებულ ვერსიაზე იმუშავა. ამ ტრეკით ის “ბითიესის” პირველი წევრი გახდა, რომელიც ბილბორდის ცხელ ასეულში დამოუკიდებლად მოხვდა.
