თბილისის კონსერვატორიის დიდ საკონცერტო დარბაზში ნუცი ნებიერიძისა და გორის ქალთა გუნდის ერთობლივი კონცერტი გაიმართა. კონცერტი სპეციალურად მოწვეული სტუმრების გრემის მფლობელი ვარსკვლავის, არი ჰონიგისა და ბიმ როდრიგესის თანამონაწილეობით შედგა, მოწვეულ სტუმართა შორის იყვნენ მუსიკოსები რეზო კიკნაძე, ლუკა თოფურია და ტეტე ნოისი.
კონცერტზე ნუცი ნებიერიძის საავტორო ალბომში შესული საგუნდო კომპოზიციები შესრულდა, რომელიც 2023 წელს Leno Records-ში ჩაიწერა.
ნიუ-იორკში და თბილისში მოღვაწე ქართველმა მომღერალმა და კომპოზიტორმა ნუცი ნებიერიძემ ჯაზში თოთხმეტწლიანი პრაქტიკის შემდეგ, ყურადღება მრავალხმიანობაზე, კომპოზიციაზე და მუსიკის ტექნოლოგიაზე გაამახვილა.
ნუცი ნებიერიძე, მომღერალი და კომპოზიტორი:
„წელს ჩვენ დავგეგმეთ ალბომ რელიზ კონცერტი და შევასრულებთ იმ კომპოზიციებს, რომლებიც შარშან ჩავწერეთ. ეს პროექტი უკვე მეორე წელია ხორციელდება და მეორედ მოვიწვიეთ მუსიკოსები ამერიკიდან. უახლოეს მომავალში ალბომიც გამოვა, რომელიც ძირითადად საგუნდო კომპოზიციებს მოიცავს, ჯაზთან ერთად. მოწვეული სტუმრები არიან არი ჰონიგისი და ბამ როდრიგესი, ორივე ამერიკაში ცხოვრობს და არიან ძალიან წარმატებული და უაღესად ნიჭიერი მუსიკოსები, ძალიან უყვართ ქართული ფოლკლორი და ვფიქრობ, მათთვისაც საინტერესო იყო გუნდთან მუშაობა. აუცილებლად უნდა ვთქვა, რომ გვყავდა ქართველი მოწვეული მუსიკოსებიც. ესენი არიან რეზო კიკნაძე, ლუკა თოფურია და ტეტე ნოისი, რომლებიც რამდენიმე კომპოზიციაში დაგვემატებიან. მეორე წელია უკვე ამერიკის საელჩო ამ პროექტის მხარდამჭერია. ისინი დაგვეხმარნენ, რათა ჩამოგვეყვანა ეს მუსიკოსები, ჩაგვეწერა ალბომი და ჩაგვეტარებინა კონცერტი. წელს ასევე პროექტის მხარდამჭერია თბილისის მერიაც.“
თეონა ცირამუა – გორის ქალთა გუნდის სამხატვრო ხელმძღვანელი:
„პირველ რიგში ძალიან დიდი მადლობა მინდა გადავუხადო ამერიკის საელჩოს და თბილისის მერიას, რომ მოგვცა კიდევ ერთხელ საშუალება გავსულიყავით ჩვენი გულშემატკივრების წინაშე და გაგვეტანა ეს პროექტი, მართლა შეიძლება პროექტი ვუწოდოთ, რადგან ძალიან დიდი შრომა ჩავდეთ მასში. რაც შეეხება ჩვენსა და ნუცის კოლაბორაციას, ის რამდენიმე წლის წინ დაიწყო მის ნაწარმოებზე, Straggle Dance-ზე მუშაობით. თავიდანვე მოვიხიბლე მისით, როცა ნოტები გამომიგზავნა, რაღაც სხვანაირი ხედვით, მათემატიკური დეტალებით, რითმული ნახაზებით, სირთულეებით. ზოგადად, მე ძალიან მიყვარს და ვაფასებ განსაკუთრებით რითმულ სირთულეებს და ეს ჩემთვის გამოწვევასავით იყო, თან დამაინტერესა, არ ვიცნობდი ამ ადამიანს და მიხარია, რომ ის პატარა დეტალი გაიზარდა, გაიზარდა და ჩვენს მეგობრობაში გადაიზარდა – როგორც მუსიკალურ მეგობრობაში, ასევე პიროვნულ მეგობრობაში. მიხარია, რომ ნუცის მეშვეობით ეს საოცარი მუსიკოსები არი ჰონიგისი და ბამ როდრიგესიც გავიცანი რომლებიც არაჩვეულებრივი და უნიჭიერესი მუსიკოსები არიან“.
აღსანიშნავია, რომ პროექტი ქართულ-ამერიკული კულტურათშორისი კავშირების გაძლიერებას და ქართული მრავალხმიანობის თანამედროვედ აჟღერებას ეხმიანება, რაც ამ მიმართლებით მუსიკის განვითარებასა და პოპულარიზაციას უწყობს ხელს.
