ახლახან რეპერმა A$AP Rocky-მ ახალი მუსიკალური ვიდეო – Tailor Swif წარადგინა. ვიდეო უკრაინაშია გადაღებული.
ვიდეოს ერთ-ერთ სცენაში ქართველი რეჟისორის, გიორგი დანელიას ფილმის, „მიმინოს” ცნობილი კადრია გაცოცხლებული. აღსანიშნავია ისიც, რომ ამ კლიპზე საპროდუქციო კომპანია Shelter Film-მა იმუშავა, რომლის ხელმძღვანელი ქართველი ალბერტ ზურაშვილია. როგორც Billboard Georgia-სთვის გახდა ცნობილი, უკრაინაში ომის დაწყების შემდეგ Shelter Film შემოქმედებით გუნდთან ერთად საქართველოში გადმოვიდა და საერთაშორისო ბაზარზე აქედან ოპერირებს.
რაც შეეხება A$AP Rocky-ს ნამუშევარს, აღსანიშნავია, რომ სინგლი Tailor Swif ინტერნეტში ადრე არაოფიციალურად გავრცელდა, რის გამოც რეპერი ტრეკის გამოშვებისაგან თავს იკავებდა. მართალია, სიმღერას ტეილორ სვიფტის სახელი ჰქვია, თუმცა პოპ-ვარსკვლავთან კომპოზიციას ამის გარდა სხვა არაფერი აკავშირებს.
მსმენელები დიდი ინტერესით ელიან A$AP Rocky-ს დაანონსებულ ალბომსაც. Don’t Be Dumb 30 აგვისტოს უნდა გამოცემულიყო, თუმცა თარიღი შეიცვალა და ალბომი შემოდგომაზე გამოვა. გამოცემის ზუსტი დრო ამ ეტაპზე არ დასახელებულა.
