ანუკა ყიფშიძემ სიმღერაზე Kreizi Frog გადაღებული ვიდეო გამოუშვა. როგორც მუსიკოსი Billboard Georgia-სთან საუბრისას ამბობს, ვიდეო ბახმაროშია გადაღებული და მუსიკაც იქ დაიწერა.
ანუკა ყიფშიძე:
„მე დავჯექი და მუსიკის კეთება დავიწყე, ქეთევან მესხიშვილმა კი იმ ვიდეოების მოგროვება დაიწყო, რომლებშიც ჩვენი თავგადასავლებია ასახული. ბახმარო ჩვენთვის უსაყვარლესი ადგილია. ის ასოცირდება ბევრ სითბოსთან, მეგობრულ გარემოსთან და ყველაზე ლაღ ზაფხულთან. ბახმაროში ჩვენს მეგობართან, მარიამ თოფურიძესთან ვრჩებით ხოლმე და მთელი ეს პერიოდი შემოქმედებითი პროცესი მიმდინარეობს. სწორედ ამ ემოციების და თავგადასავლების გადმოცემა გვინდოდა ამ ვიდეოში. მუსიკა მხიარულია და თან ცოტა სენტიმენტალურიც.”
როგორც ანუკა ყიფშიძე ამბობს, მისთვის ეს სიმღერა და ვიდეო მეგობრობისადმი მიძღვნილი სამახსოვრო ნამუშევარია.
ვიდეოში გამოყენებული კადრები ქეთევან მესხიშვილმა გადაიღო. კლიპის მონტაჟზეც მან იმუშავა. ვიდეოში ანიმაციებსაც ვხვდებით, რომლებიც ანუკა ყიფშიძის მეგობრების, ქეთევან მესხიშვილის, ანა ხოფერიას, ნუზის და მარიამ თოფურიძის ერთობლივი ნამუშევარია. ტექსტი ანა ხოფერიას ეკუთვნის.
რაც შეეხება სამომავლო გეგმებს, როგორც ანუკა ყიფშიძე აღნიშნავს, ის აქტიურად მუშაობს ახალ ტრეკებზე. რამდენიმე მათგანი უკვე მზად არის და მათ მსმენელს მალე გაუზიარებს. არტისტი ნოემბერში კონცერტსაც გეგმავს.
ანუკა ყიფშიძის, როგორც სოლო არტისტის, დებიუტი 2024 წლის აპრილში შედგა. არტისტს ამ დროისთვის გამოცემული აქვს ერთი ალბომი, სახელწოდებით Ma Tsa De.
