ორი წელი გავიდა მას შემდეგ, რაც ლედი გაგას სიმღერა Bloody Mary სოციალურ ქსელ TikTok-ში ტრენდად იქცა. ეს არის ვირუსული ტრენდი, რომელიც ნეტფლიქსის შოუს, Wednesday-ს უკავშირდება. ახლახან საერთაშორისო პრესაში გავრცელებული ინფორმაციით, ლედი გაგა სერიალის სამსახიობო გუნდს შეუერთდა.
The Hollywood Reporter-ის ინფორმაციით, გაგა Addams Family-ს ისტორიით შთაგონებული შოუს მეორე სეზონში მთავარი როლის შემსრულებელ ჯენა ორტეგასთან ერთად გამოჩნდება. Wednesday-ს ახალი სეზონის პრემიერა 2025 წლისთვის იგეგმება. ლედი გაგას როლის შესახებ დეტალები ჯერჯერობით უცნობია, თუმცა სერიალის გადაღებები უკვე მიმდინარეობს ირლანდიაში.
Billboard-მა კომენტარისთვის ლედი გაგას და Netflix-ის წარმომადგენლებს მიმართა.
ლედი გაგას მეორე სეზონში გამოჩენა ვარსკვლავისათვის პირველ ოფიციალური თანამშრომლობაა Wednesday-ს შემქმნელებთან, თუმცა არტისტი არაოფიციალურად ამ შოუსთან ჯერ კიდევ პირველი სეზონის პრემიერისას, 2022 წელს გადაიკვეთა. ეს ისტორია ჯენა ორტეგას ცნობილ სცენას უკავშირდება, სადაც ვენსდეი ადამსის პერსონაჟი The Cramps-ის 1981 წლის სიმღერაზე, Goo Goo Muck-ზე ცეკვავს. ეს ფრაგმენტი სოციალურ ქსელებს ვირუსულად მოედო, ფანებმა კი ის ახლებური ინტერპრეტაციით დაამონტაჟეს და ფონად გაგას სიმღერა Bloody Mary დაამატეს. მონტაჟის ასეთმა ვერსიამ TikTok-ზე ტრენდი შექმნა – მომხმარებლები გაგას სიმღერაზე ვენსდეი ადამსის ცნობილ ქორეოგრაფიულ ნომერს თავადვე ასრულებდნენ და სოციალურ ქსელში აქვეყნებდნენ. Bloody Mary-ს ტრენდმა განაპირობა ისიც, რომ სიმღერა მისი გამოსვლიდან 11 წლის შემდეგ Billboard Hot 100-ში მოხვდა.
რაც შეეხება თავად სერიალს, Wednesday-ის პირველ სეზონში მოქმედება მთავარი პერსონაჟის, ვენსდეი ადამსის ირგვლივ ვითარდება, როცა ის ჯადოქრებისათვის განკუთვნილ მაგიურ კოლეჯში იწყებს სწავლას. ჯენა ორტეგასთან ერთად, შოუს მთავარ როლში მაყურებელმა ასევე იხილა კეტრინ ზეტა-ჯონსი, რომელიც მორტიშა ადამსს განასახიერებს.
Bloody Mary-ის ცნობილი ტრენდის დროს ორტეგამ გაგას სერიალში მონაწილეობის შესაძლებლობა განიხილა. 2023 წლის იანვარში Golden Globes-ის წითელ ხალიჩაზე ორტეგამ აღნიშნა: „დარწმუნებული ვარ, Netflix-ს ის ძალიან მოეწონება.”
წელს გაგამ ხოაკინ ფენიქსთან ერთად Joker: Folie à Deux-ში ჰარლი ქუინის როლი შეასრულა, რის პარალელურადაც ფილმის თანმხლები მუსიკალური ალბომი – Harlequin გამოსცა. ლედი გაგას სამსახიობო კარიერა ასევე მოიცავს ფილმებს: A Star Is Born და House of Gucci. გაგა სერიალ American Horror Story-შიც მონაწილეობდა.
ამჟამად მომღერალი თავისი მეშვიდე სტუდიური ალბომის გამოსაცემად ემზადება. პრემიერა თებერვალშია დაგეგმილი. ალბომის მთავარი სინგლი სახელწოდებით Disease ოქტომბრის ბოლოს გამოვიდა და Billboard-ის Hot 100-ის ჩარტში 27 ადგილი დაიკავა.
