„ემილია პერესი” 2025 წლის ოქროს გლობუსის მთავარი გამარჯვებული გახდა. ფილმმა ჯამში ოთხი ჯილდო დაიმსახურა: საუკეთესო ფილმი, დრამა; საუკეთესო არაინგლისურენოვანი ფილმი; ფილმისთვის შექმნილი საუკეთესო ორიგინალური სიმღერა – El Mal და ქალის მეორეხარისხოვანი როლის საუკეთესო შემსრულებელი – ზოი სალდანა.
Shōgun კი სატელევიზიო მიმართულების მთავარი გამარჯვებული გახდა ასევე ოთხი ჯილდოთი: გაიმარჯვა ნომინაციაში საუკეთესო სატელევიზიო სერიალი, დრამა და მიიღო სამი საშემსრულებლო ჯილდო მსახიობებისთვის ანა სავაი, ჰიროუკი სანადა და ტადანობუ ასანო.
ოქროს გლობუსის 82-ე დაჯილდოების ცერემონია კვირას ბევერლი ჰილსში შედგა.
ყველაზე მაღალშემოსავლიანი ფილმი Wicked გახდა. შარშან, ნომინაციის სადებიუტო წელს, ეს ჯილდო „ბარბის” ხვდა წილად, რის შემდეგაც ფილმმა ოსკარის რვა ნომინაცია დაიმსახურა, მათ შორის საუკეთესო ფილმის. წლევანდელი ოსკარის ნომინაციები 17 იანვარს გახდება ცნობილი. რაც შეეხება Wicked-სა და „ბარბის”, ორივე ფილმის საუნდტრეკი Billboard 200-ის მეორე ადგილზე გავიდა, თუმცა Wicked-ს აქვს შანსი, პირველ ადგილსაც მიაღწიოს.
ფილმის საუკეთესო საუნდტრეკის კატეგორიაში ტრენტ რეზნორმა და ატიკუს როსმა გაიმარჯვეს ფილმისთვის Challengers. ეს ამ კატეგორიაში მათი მესამე გამარჯვებაა The Social Network-ისა (2011) და Soul-ის (2021) შემდეგ.
დემი მური თავისი პირველი ოქროს გლობუსის მფლობელი გახდა ქალის როლის საუკეთესო შესრულებისთვის მიუზიკლსა ან კომედიაში – ფილმისთვის The Substance. 34 წელი გავიდა, რაც მსახიობი პირველად წარადგინეს ამავე კატეგორიაში ფილმისთვის Ghost.
ალი ვონგს გადაეცა ჯილდო საუკეთესო სატელევიზიო სტენდ-აპ კომედიაში „ნეტფლიქსის” პროგრამისთვის Ali Wong: Single Lady. ეს გადაწყვეტილება დამსწრე საზოგადოებისთვის სიურპრიზი აღმოჩნდა, რადგან ბევრი ელოდა, რომ ნომინაციის გამარჯვებული ღონისძიების წამყვანი ნიკი გლეიზერი გახდებოდა – HBO/Max-ის პროგრამისთვის Nikki Glaser: Someday You’ll Die.
საუკეთესო ანიმაციური ფილმი Flow გახდა, რომელმაც ამ კატეგორიაში დაამარცხა The Wild Robot, ასევე Inside Out-ისა და „მოანას” სიქველები.
დაჯილდოების ცერემონიას ყველა გამარჯვებული ესწრებოდა, The Bear-ის ვარსკვლავის, ჯერემი ალენ უაიტის გარდა, რომელმაც გაიმარჯვა ნომინაციაში კაცის როლის საუკეთესო შემსრულებელი სატელევიზიო სერიალში – მიუზიკლი ან კომედია.
ოქროს გლობუსს Dick Clark Productions წარმოადგენს. მისი მფლობელი კი Penske Media Corporation-ია, რომელიც ასევე Billboard-ის მშობელი კომპანიაა.
