8 მაისს ჰარი სტაილსი წმინდა პეტრეს მოედანზე იმ ათასობით ადამიანთან ერთად იმყოფებოდა, ვინც ვატიკანში პაპ ლეო XIV-ს არჩევას დაესწრო.
სუპერვარსკვლავი წმინდა პეტრეს მოედანზე, სათვალითა და კეპით დააფიქსირეს, რომელზეც ეწერა Techno is my boyfriend.
სოციალურ მედიაში გულშემატკივრებს ჰარი სტაილსის წმინდა პეტრეს მოედანზე ყოფნა შეუმჩნეველი არ დარჩენიათ, ერთ-ერთი მათგანი X-ზე წერს: „პაპმა ვერც კი გაიაზრა, რომ მას ხელს ჰარი სტაილსი უქნევდა.”
აპრილში, პაპ ფრანცისკეს გარდაცვალების შემდეგ, ვატიკანში ახალი პაპი ლეო XIV აირჩიეს. 69 წლის ამერიკელი მისიონერი რობერტ პრევოსტი რომის 267-ე პაპია და ისტორიაში პირველი პონტიფიკოსი, რომელიც აშშ-ში დაიბადა.
ჰარი სტაილსი 2023 წელს დასრულებული მსოფლიო ტურნეს, Love on Tour-ის შემდეგ ნაკლებად აქტიურობს. მუსიკოსმა ტურნე 2021 წელს დაიწყო. სტაილსისთვის ეს მნიშვნელოვანი პერიოდი იყო, მან ნიუ-იორკში Madison Square Garden-ში 15 და ლოს ანჯელესის Kia Forum-ში დამატებით კიდევ 15 კონცერტი გამართა.
ჰარი სტაილსის მესამე სტუდიურმა ალბომმა Harry’s House (2022) დიდ წარმატებას მიაღწია. ალბომის ჰიტ სინგლი As It Was 15 კვირის განმავლობაში ლიდერობდა Billboard Hot 100-ის პირველ პოზიციაზე, თავად ალბომი კი Billboard 200-ის სათავეში ორჯერ მოხვდა. 2023 წლის გრემის დაჯილდოებაზე სტაილსის ალბომმა Harry’s House წლის ალბომის ტიტული მიიღო.
გლობალური ტურნეს შემდეგ ჰარი მსოფლიოს გარშემო მოგზაურობს. მარტში მომღერალი ტოკიოს მარათონში იღებდა მონაწილეობას, სადაც 37 000-ზე მეტი მორბენალიდან 6010-ე ადგილი დაიკავა, აპრილში კი ლონდონის მარათონს შეუერთდა.
