რინგო სტარი წელს ლონდონში რეჟისორ სემ მენდესს შეხვდა და Beatles-ის ბიოგრაფიული ფილმის სცენარზე ისაუბრა, სადაც მან გარკვეული კორექტივები შეიტანა.
The New York Times-თან ინტერვიუში მუსიკოსმა აღნიშნა, რომ აპრილში რეჟისორთან ორი დღის განმავლობაში დეტალურად განიხილა სცენარი, სადაც Beatles-ის დრამერის როლს ბარი კეოგანი ასრულებს. გამოცემა წერს, რომ სტარმა სცენარში საკმაოდ მნიშვნელოვანი შესწორებები შეიტანა, რათა ფილმის სიუჟეტი უფრო ახლოს ყოფილიყო რეალობასთან.
განსაკუთრებით მკაფიო მითითებები რინგო სტარს სცენარის იმ ეპიზოდებზე ჰქონდა, რომლებიც მის პირად ცხოვრებას და პირველ ცოლთან, მოურინ სტარკთან ურთიერთობას ასახავდა. „ფილმზე ძალიან კარგმა სცენარისტებმა იმუშავეს, ტექსტი მართლაც კარგად იყო აწყობილი, თუმცა მას არაფერი ჰქონდა საერთო ჩემი და მოურინის უერთიერთობასთან, ეს ყველაფერი ასე არ იყო.” – განმარტა მუსიკოსმა.
რინგო სტარმა და მოურინ სტარკმა 1965 წელს იქორწინეს. მათ სამი შვილი შეეძინათ, მათ შორის ყოფილი Oasis-ისა და The Who-ს დრამერი ზაკ სტარკი. წყვილი 1975 წელს დაშორდა, ხოლო 1981 წელს მუსიკოსმა მსახიობსა და მოდელ ბარბარა ბახზე იქორწინა.
მსახიობთა ჩამონათვალის მიხედვით, რინგო სტარის როლს ბარი კეოგანი შეასრულებს, ჯონ ლენონის პერსონაჟს ჰარის დიკინსონი, პოლ მაკარტნის – პოლ მესკალი, ხოლო ჯორჯ ჰარისონს ჯოზეფ ქუინი განასახიერებს.
ოთხივე ფილმის სცენარზე ტონის ჯილდოს მფლობელი ჯეზ ბატერვორტი, ოსკარის მფლობელი პიტერ სტრაუნი და BAFTA-სა და ტონის მფლობელი ჯეკ თორნი მუშაობენ.
The Beatles-ის ოთხ ნაწილიანი ფილმის პრემიერა 2028 წლის დასაწყისშია დაგეგმილი. პროდიუსერთა განცხადებით, თითოეული მათგანი ჯგუფის ოთხი წევრის ისტორიას ჰყვება, თუმცა მათ გადაკვეთის წერტილები აერთიანებს და საბოლოოდ, ისტორიაში უდიდესი ბენდის საოცარ ამბავს მოგვითხრობს.
