სელინ დიონმა მძიმე მეტალის ლეგენდარული მუსიკოსის, Black Sabbath-ის ფრონტმენის, ოზი ოსბორნის ხსოვნას ემოციური სიტყვებით პატივი მიაგო და მას უშიშარი და დიდსულოვანი უწოდა.
„ძალიან დამწყვიტა გული ოზი ოსბორნის გარდაცვალებამ, ჩვენ მრავალი წლის განმავლობაში ერთი ლეიბლის არტისტები ვიყავით. მიუხედავად იმისა, რომ ორი სრულიად განსხავებული მუსიკალური სამყაროდან მოვდივართ, მე ყოველთვის აღფრთოვანებული ვიყავი მისი უსაზღვრო სულისკვეთებით. მიყვარს მისი სიმღერები, განსაკუთრებით, Mama, I’m Coming Home. ის იყო ორიგინალური, უშიშარი, კეთილი, გულისხმიერი და ამავდროულად დიდსულოვანი ადამიანი.”- წერს სელინ დიონი სოციალურ ქსელში.
ოზი ოსბორნი 22 ივლისს 76 წლის ასაკში გარდაიცვალა. 30 ივლისს ლეგენდარული მუსიკოსის სამგლოვიარო პროცესია ბირმინგემში გაიმართა, სადაც ათასობით გულშემატკივარი მისი ხსოვნისადმი პატივისცემის ნიშნად შეიკრიბა. მსვლელობას წინ ორკესტრი მიუძღოდა, რომელიც ჰიტებს – Iron Man-ს და Crazy Train-ს ასრულებდა. ოზის მეუღლე შერონი და მისი შვილები: ჯეკი, კელი და ემი – ოსბორნს ბოლო გზაზე აცილებდნენ. კელი ოსბორნი მამის ცნობილ იისფერ სათვალეს ატარებდა, შერონს კი გულზე მეუღლის საქორწინო ბეჭედი ეკიდა.
ოზი ოსბორნის მუსიკალური კარიერის ბოლო, საჯარო გამოსვლა 5 ივლისს ბირმინგემში, Back to the Beginning-ის შოუზე შედგა. ეს იყო Black Sabbath-ის გამოსამშვიდობებელი კონცერტი, რომელიც მარადიულად, ფილმის სახით დარჩება. ჩანაწერის გამოშვებას Mercury Studios 2026 წლისთვის გეგმავს. კონცერტიდან მიღებული შემოსავალი საქველმოქმედო ორგანიზაციებში, მათ შორის Cure Parkinson‑ისა და ბირმინგემის ბავშვთა საავადმყოფოს ფონდში გადაირიცხება.
მუსიკალური სამყაროდან ოზი ოსბორნს პატივს მიაგებენ სხვა არტისტებიც, მათ შორის არიან: ელტონ ჯონი, ბილი ჯო არმსტრონგი, ელის კუპერი, ზაკკ ვაილდი, Coldplay, Ghost-ის ტობიას ფორჯი, Yungblud, პატ ბუნე, ადამ სენდლერი, Black Sabbath-ის წევრები ტონი ლომი, გიზერი ბატლერი და ბილ ვარი.
ოზი ოსბორნის გულშემატკივრებმა Change.org‑ზე პეტიციები შეადგინეს, სადაც ისინი ბირმინგემის აეროპორტისთვის და როკისა და მეტალის Download ფესტივალის ერთ-ერთი სცენისთვის ოზი ოსბორნის სახელის მინიჭებას ითხოვენ. აღსანიშნავია, რომ ერთ-ერთ პეტიციაზე ერთ კვირაში 52 000-ზე მეტი ხელმოწერა შეგროვდა.
