Oasis-ის გულშემატკივარი კონცერტის დროს, ინგლისში, Wembley-ს სტადიონზე, სიმაღლიდან გადმოვარდნის შედეგად გარდაიცვალა. ბენდმა ამის შესახებ 3 აგვისტოს განცხადება გაავრცელა, სადაც ტრაგედიის გამო მწუხარება გამოხატა. ლონდონის პოლიციამ განაცხადა, რომ ოფიცრები და სასწრაფო დახმარების ბრიგადა შემთხვევის ადგილზე შეტყობინების მიღების შემდეგ მივიდნენ.
სამართალდამცავების ინფორმაციით, 40 წლამდე გულშემატკივარი შემთხვევის შედეგად ადგილზე გარდაიცვალა. პოლიციამ მოუწოდა ყველას, ვინც მომხდარს შეესწრო ან მობილურით ვიდეოგადაღება მოახერხა, დაუკავშირდეს მათ და მიაწოდოს ინფორმაცია.
„შოკირებული და დამწუხრებული ვართ მას შემდეგ, რაც გუშინდელი შოუს დროს გულშემატკივრის ტრაგიკული დაღუპვის შესახებ შევიტყვეთ. გულწფელად ვუსამძიმრებთ დაღუპულის ოჯახსა და მეგობრებს.” – ნათქვამია Oasis-ის განცხადებაში, რომელსაც The Associated Press ავრცელებს.
The Hollywood Reporter-ის მიერ გამოქვეყნებულ განცხადებაში Wembley-ს სტადიონის პრესსპიკერმა მომხდარი დაადასტურა: „გუშინ ღამით Wembley-ის სტადიონზე ინციდენტის შემდეგ ლონდონის სასწრაფო დახმარების სამსახურის ექიმები და პოლიცია ადგილზე გამოცხადდნენ. მიუხედავად მათი ძალისხმევისა, სამწუხაროდ, გულშემატკივარს სიცოცხლისადმი შეუსაბამო დაზიანებები აღმოაჩნდა და ადგილზე გარდაიცვალა. პოლიციამ მოუწოდა ყველას, ვინც ინციდენტს შეესწრო, სასწრაფოდ დაუკავშრდეს მათ.”
Oasis-მა თითქმის 16 წლიანი პაუზის შემდეგ პირველი ტურნე უელსში 4 ივლისს გამართა. 2 აგვისტოს ჩატარებული კონცერტი Wembley-ს სტადიონზე შვიდი კონცერტიდან რიგით მეოთხე შოუ იყო. მსოფლიო ტურნე გაგრძელდება ჩრდილოეთ ამერიკაში, აზიაში, ავსტრალიაში, სამხრეთ ამერიკასა და ევროპაში.
