7 აგვისტოს მერაია ქერის BBC Radio 2-თან ინტერვიუ გამოქვეყნდა, სადაც მომღერალმა პირველად შეიტყო, რომ კეტი პერიმ კომპანია Blue Origin-ის მიერ განხორციელებულ ისტორიულ პროექტში მიიღო მონაწილეობა. ექსპედიციაში, რომელიც დედამიწის ატმოსფეროს მიღმა, კოსმოსში მოგზაურობას გულისხმობდა, სხვა ქალ მგზავრებთან ერთად კეტი პერიც ჩაერთო. მიუხედავად იმისა, რომ ეს ამბავი აპრილში მოხდა და თითქმის ყველა მედია საშუალებით გავრცელდა, ამის შესახებ მერაია ქერიმ ახლახან შეიტყო. “კოსმოსში წავიდა? სად წავიდა? შეაღწია ორბიტაზე და უკან დაბრუნდა? ეს მართალია? ნამდვილად შთამბეჭდავია.” – ამბობს მერაია ქერი.
როცა მერაიას ჰკითხეს, სურს თუ არა მასაც ვარსკვლავებისკენ მოგზაურობა, არტისტმა ხუმრობით უპასუხა: “ვფიქრობ, საკმარისი გავაკეთე.”
კეტი პერის კოსმოსური მოგზაურობის შესახებ ინფორმაცია უამრავმა გამოცემამ გაავრცელა. არტისტთან ერთად რამდენიმე ქალი მგზავრიც იმყოფებოდა, ვინც დედამიწიდან ჯეფ ბეზოსის კომპანიის კოსმოსური ხომალდით გაფრინდა, ატმოსფეროს საზღვარს მიაღწია და 10 წუთში უკან დაბრუნდა.
ექსპედიცია ფართო კრიტიკის საგანიც გახდა, ზოგმა ეს რესურსების ფლანგვად შეაფასა, თუმცა თავად კეტი პერიმ იგი ქალების გამაძლიერებელ ჟესტად აღიქვა და დედამიწაზე დაბრუნებულმა ჟურნალისტებს განუცხადა: “ეს არის მომვალი ქალებისთვის ახალი სივრცის შექმნა, ახალი ადგილის დამკვიდრება, ეს ყველაფერი კი დედამიწის საკეთილდღეოდ კეთდება.“
მერაია ქერი კი მყარად დგას მიწაზე და ახალი ალბომის გამოშვებაზეა კონცენტრირებული. პოპვარსკვლავი ალბომის Here for It All-ის გამოცემას სექტემბერში გეგმავს, რომელშიც შედის სინგლები Type Dangerous და Sugar Sweet.
